Mika 1 - MUKANDA USANDU WA ZAMBI 1975

¹ Liji lia Yehova lize liejile kuli Mika wa ku Morese ha matangwa ja Yotame, ni Ahaze, ni Hezekia mianangana ja Yunda, lize amwene lia kutwala ku Samaria ni Yerusaleme.

² Ivwenu enu eswe akwa mavungu; panjika ena hashi ni yuma yeswe yiliho, hanga Mwene Yehova akapwe chela wa kunushindakenya, mwe Mwene ku tembele yenyi yisandu.

³ Mumu nyingikenu, Yehova kanakatuka kuma kwenyi, kumakahulumuka ni kuliata ha milundu ya hashi.

⁴ Milundu muyikasangunuka kushi lia yiliato yenyi, ni yikulo muyikapulika ngwe sera kumeso ja kahia, ngwe meya akuzujila homa ha kupalumuka.

⁵ Chino cheswe mumu ha Utanguko wa Yakomba ni milonga ya munyachi ya Izalele. Utanguko wa Yakomba uka? Hi Samaria ko? Mulonga wa munyachi wa Yunda uka? Hi Yerusaleme ko?

⁶ Kashika mungupwisa Samaria mulumba mu chifuchi cha washi, kuma kwa kulimina minda ya uva. Munguzukula mawe jenyi mu chikulo ni kufukula fundamentu jenyi.

⁷ Tuponya twenyi maapalwola yipalupalu; fweto yeswe ya ukoi wenyi mayocha; mahamba jenyi eswe maenyeka. Mumu yakatukile ku fweto ya ukoi, kashika ku fweto ya ukoi muyikaya.

⁸ Ha chuma chino mungulinyenga ni kulila mbimbi; mungwenda wa kufukula, ni uselesele; mungulila lungungu ngwe mikuza; nikulishimwoka ngwe yikungulu.

⁹ Mumu mbandu jenyi kechi kahasa kujiwuka; hijaheta ndo ku Yunda, hijaheta ndo ku chikolo cha atu jami, kwe ku Yerusaleme.

¹⁰ Kanda nuchambulula mu Ngata, kanda nulila chipwe hakehe. Lilangumunenu mu fufuta mu Mbete-le-Afara.

¹¹ Enu akwa Shafiri, palikenu jila yenu ni Uselesele ni sonyi. Enu akwa Zanana, kanda nutuhuka. Kulila mbimbi cha Mbete-Ezele muchinuchiza umanyino.

¹² Akwa Marote kanatwaminyina nikutalatala chimwe chipema, mumu chuma chikalu hichahulumuka mwilu kuli Yehova ndo ku chikolo cha Yerusaleme.

¹³ Enu akwa Lakishi kashilenu tuvwalu ku matemba, enu nwapwile uputukilo wa uvulumunyi kuli mwana-pwo Zaione, mumu muli yenu awanyine Utanguko wa Izalele.

¹⁴ Kashika munuhana yawana ya kulishika kuli Moreshete-Ngate; mazuwo ja Akaziba mapwa kwonga kuli mianangana ja Izalele.

¹⁵ Cheka nawa munguneha mukwa kukumba hali yenu akwa Maresa; uhenya wa Izalele muwiza ku Ndulame.

¹⁶ Lipwisenu ni lwole; litewulenu kambu jenu ha mukunda wa ana ja uwahililo wenu. Litewulenu ngwe makuyu, mumu manukatuka nikuya ku unjize.