Miaso (Masamu) 98 - MUKANDA USANDU WA ZAMBI 1975

Samu.

¹ Embilenu Yehova mwaso waha, mumu hanalingi yuma ya kukomwesa. Kwoko lienyi lia chindume, kwoko lienyi lisandu hilinalingi ulamwino hali iye mwene.

² Yehova hanasolola ulamwino wenyi. Ululi wenyi hanausolola pundu kumeso ja mavungu.

³ Hanewuluka utu wa zango lienyi ni umwenemwene wenyi ku jiko lia Izalele. Ndo ku masongo a hashi hanamono ulamwino wa Zambi yetu.

⁴ Likiwizenu kuli Yehova akwa hashi eswe. Lusukenu nukembe ni uwahililo, ewa, imbenu uhaliso.

⁵ Imbenu nikuhalisa Yehova ni kalialia. Imbenu ni kalialia ni liji lia mimbo.

⁶ Likwizenu kumeso ja Mwanangana Yehova, ni yitavwi ni liji lia njalamina.

⁷ Kalunga-lwiji akakulunguze ni kulumbama chenyi, ni hano hashi ni waze eswe atwamaho.

⁸ Njiji jikasakwile ni moko jo. Milundu yikembe miaso ya uwahililo hamuwika,

⁹ kumeso ja Yehova, mumu kaneza mukupatwila hashi. Kumakapatwila muno-muze ni ululi. Kumakapatwila mavungu ja atu nikulita.