Miaso (Masamu) 96 - MUKANDA USANDU WA ZAMBI 1975

¹ Imbenu mwaso waha kuli Yehova. Embilenu Yehova, enu akwa hashi eswe.

² Embilenu Yehova; fumanyisenu jina lienyi; ambujolenu ulamwino wenyi tangwa ha tangwa.

³ Lumbununenu ulemu wenyi hakachi ka mavungu. Lumbununenu yitanga yenyi ya kukomwesa hakachi ka minyachi yeswe.

⁴ Mumu Yehova munene, chatamba kumuhalisa chikolo. Chatamba kumuvwila woma kuhiana mazambi akwo eswe.

⁵ Mumu mazambi a mavungu apwa yuma yamokomoko alioze Yehova iye tangi ya malilu.

⁶ Uhenya ni ulamba watwama kumeso jenyi; tachi ni upeme watwama muma mwenyi musandu.

⁷ Hanenu kuli Yehova enu minyachi ya atu, hanenu kuli Yehova ulemu ni tachi.

⁸ Hanenu kuli Yehova ulemu wa jina lienyi. Nehenu mulambu nukanjile mu yize yenyi.

⁹ Wayilenu Yehova mu upeme wa usandu. Chikimenu kumeso jenyi akwa hashi eswe.

¹⁰ Ambenu hakachi ka mavungu ngwenu, Yehova kanayulu! Hashi kuhanakolo kuhechi kuhasa kunyika. Iye kumakayula atu nikulita.

¹¹ Malilu akawahilile, hashi hakevwe chiseke. Kalunga-lwiji akakulunguze ni kulumbama chenyi.

¹² Minda yikalikwize ni yuma yeswe yatwamamo; mba mitondo yeswe ya mu musenge muyikemba ni chiseke,

¹³ kumeso ja Yehova mumu kaneza. Kaneza mukupatwila akwa hashi, kumakapatwila muno-muze ni ululi, ni mavungu kumakaapatwila ni umwenemwene.