Miaso (Masamu) 95 - MUKANDA USANDU WA ZAMBI 1975

¹ Tatuyenu twimbile miaso Yehova, tulikwizenu kumeso ja lie liwe lia ulamwino wetu.

² Tukatukenu kumeso jenyi nikusakwila, tulikwizenu kumeso jenyi ni masamu.

³ Mumu Yehova iye Zambi munene; iye mwanangana munene helu lia mazambi eswe.

⁴ Mambongo eswe a hashi mu kwoko lienyi atwama. Kusuha cha milundu nichenyi nawa.

⁵ Kalunga-lwiji niwenyi, iye wamutangile. Moko jenyi awumbile hashi homu nawa.

⁶ Tatuyenu tukawayile nikulihetamisa. Tukafukame kumeso ja Yehova Tangi yetu.

⁷ Mumu iye Zambi yetu. Yetu twapwa tuli atu a ku kelo jenyi. Tuli mapanga a mu kwoko lienyi. Musono nyi munwivwa liji lienyi,

⁸ kanda nukalisa mbunge jenu ngwe ku Meripa ha tangwa lize lia Masa mu puya,

⁹ muze akakenu angwihile nikungweseka, nikumona yitanga yami.

¹⁰ Makumi awana a miaka ndusu napihilile ni chisemuko chize. Nambile ngwami, Wano atu akwa kuhenga mu mbunge jo; kanyingikine majila jami.

¹¹ Kashika nalishingile mu ufwatulo wami ngwami, Kechi kanjila mu uhwimino wami.