Miaso (Masamu) 94 - MUKANDA USANDU WA ZAMBI 1975

¹ Yehova, Zambi mukwa kukala; Zambi mukwa kukala, temuka kama.

² Katuka kama yena Chipatula-milonga wa akwa hashi. Linga kuli akwa kulengumuka chize chinaatela.

³ Yehova, ndo mwiji muka, ndo mwiji muka yingulungulu makumba?

⁴ Ndo mwiji muka malusukila yuma ya kulivwimba? Akwa kulinga yipi eswe kakulinga.

⁵ Yehova, kakufwenya atu je; kakupinjisa chihinga che.

⁶ Kakushiha twamishi ni chilambala; kakushiha ni ungalwe ana-ashiwa.

⁷ Hindu kakwamba ngwo, Yehova keshi kumona; Zambi ya Yakomba keshi kunyonga.

⁸ Nyongenu yenu hakachi ka atu nunapu ngwe tushitu. Enu yihepuke, tangwa lika mununyonga mana?

⁹ Yoze wasele twitwi keshi kwivwa nyi? Yoze walulikile liso keshi kumona nyi?

¹⁰ Yoze wakulongesa mavungu, te keshi kufumba nyi? Yoze wakulongesa mana kuli atu.

¹¹ Yehova kananyingika manyonga ja atu, ngwenyi, Kapwa amokomoko.

¹² Kawaha yoze wakumufumba yena, Yehova; yoze wakumulongesa ku shimbi je,

¹³ hanga umwehe kuhwima ku matangwa a luyinda, ndo hatula wina hali yingulungulu.

¹⁴ Mumu Yehova kechi kumbila atu jenyi. Kechi kwehuka chihinga chenyi.

¹⁵ Mumu upatwilo muwalumuka nawa ululi ni eswe akwa kululama mu mbunge maukaula.

¹⁶ Iya makatuka hali yami mukulimika ni akwa kulinga yipi? Iya mangumanyina kama kulimika ni akwa kulinga uhenge?

¹⁷ Nyi kachi Yehova kapwile chikwashi chami kachi mwono wami hiwatwama mu chifuchi cha kulungunga.

¹⁸ Muze nambile ngwami, Chiliato chami chinasenunuka, utu wa zango lie wangukwachililile, Yehova.

¹⁹ Hakachi ka kulumbama cha manyonga jami muchima, kulembejeka che changuwahisa.

²⁰ Ngunja ya ungulungulu yize yakutaka uhuka ngwe shimbi, muyihasa kulifutula hamuwika ni yena, nyi?

²¹ Kakukungulukila mukulimika ni mwono wa mukwa ululi, nikuhisa manyinga aze anasambe.

²² Alioze Yehova iye kaposhi kami musuku. Zambi yami iye liwe liami lia kuchinyina.

²³ Iye hanahilwisa hali ayo uhenge wo ene. Kumakaapatula mu wupi wo ene. Yehova Zambi yetu kumakaapatula.