Miaso (Masamu) 92 - MUKANDA USANDU WA ZAMBI 1975

Samu. Mwaso wa tangwa lia Sambata.

¹ Chinapeme kusakwilila Yehova, nikwimbila uhaliso jina lie, mwe Chitunda.

² Chinapeme kwambulula utu wa zango lie ha chimene, ni umwenemwene we ha ufuku,

³ ha chisaji cha kumi lia kusa, ni ha kalialia, ni Higaione ha chisaji cha kusa.

⁴ Mumu yena Yehova hiwangwaha chiseke mumu ha yitanga ye. Mungukumba ni yitanga ya moko je.

⁵ Yehova, yitanga ye yinene, manyonga je asuku chikolo.

⁶ Mutu yoze walifwa ni kashitu keshi kuchinyingika. Kuchichi kulumbunuka kuli chihepuke.

⁷ Muze yingulungulu masoka ngwe mwambu ni akwa kulinga uhenge mawaha, muchipwa chocho hanga akaonwone cha mutolo.

⁸ Alioze yena Yehova uli mwilu ndo ku miaka ya mutolo.

⁹ Mumu akwa kole je, Yehova, akwa kole je kumanonga. Akwa kulinga uhenge kumamwangana.

¹⁰ Alioze mbinga yami hiwayinangamisa ngwe mbinga ya mbau. Hananguwayisa ni maji aha.

¹¹ Meso jami hanamono chize nazangile hali akwa kole jami. Matwi jami hanevu chize nazangile hali akwa yitanga yipi aze angukatukilile.

¹² Mukwa ululi kumakawaha ngwe mungaji. Kumakatatuka ngwe musedru wa mu Lebano.

¹³ Waze haatumba mu zuwo lia Yehova kumakatatuka mu yize ya Zambi.

¹⁴ Kumakema mihuko ndusu mu ushinakaji wo. Kumakahaka. Kumakapwa a wisu.

¹⁵ Kulweza ngwo, Yehova mukwa ululi. Iye liwe liami, kumushi uhenge muli iye.