Miaso (Masamu) 91 - MUKANDA USANDU WA ZAMBI 1975

¹ Yoze watwama muma mwa kuswama mwa mwe Chitunda kumakatwama mu chihuhumuke cha Mukwa-Ndundo-Jeswe.

² Kumavuluka Yehova ngwenyi, Iye uchinyino wami kanda mbonge yami ni Zambi yami yoze namufuliela.

³ Mumu kumakakupulula ku kambwila lia chipinda ni ku chilungo cha kwonwona.

⁴ Kumakakufuka ni ngona jenyi. Mushi lia mapulwa jenyi mukachinyina. Umwenemwene wenyi wapwa lukepwe, ni mukehe ni munene.

⁵ Kushi kususuka ha mwongo wa ufuku, chipwe ha mwivu wa kuhumuka ha mwalwa.

⁶ Chipwe ha chilungo chize cha kupalika mu milima, chipwe ha kwonwona chize cha kulalisa tangwa ha muchima.

⁷ Kanunu ka atu makalimbuka ku lumbu lie; kumi lia tununu mulikalimbuka ku kwoko lie lia chindume, hindu kuchichi kakukundama.

⁸ Mukachitala ni meso je wika, ukamone kwononona cha yingulungulu.

⁹ Mumu hiwatenga Yehova uchinyino we, hiwatenga mwe Chitunda zuwo lie lia kutwama.

¹⁰ Chipi nichimwe kuchichi kukukwata, chilungo nichimwe kuchichi kukundama ku mbalaka ye.

¹¹ Mumu kumahana shimbi kuli angelo jenyi ha kutwala kuli yena, akakufunge mu majila je eswe.

¹² Kumakakumbata mu moko jo kuchina mukahukana ha liwe.

¹³ Kumukaliata hali ndumba ni fwiji. Mwevu wa ndumba ni kapela kumukaawonda kushi lia yiliato ye.

¹⁴ Mumu hangusela zango lienyi kashika mungumupulula. Mungumutwamisa kwilu mumu hanyingika jina liami.

¹⁵ Kumakangusanyika mba mungumukumbulula. Mungupwa hamwe nenyi mu lamba; mungumupulula; mungumukolesa.

¹⁶ Mungumuyukisa ni mwono wa miaka yinji. Mungumulweza ulamwino wami.