Miaso (Masamu) 90 - MUKANDA USANDU WA ZAMBI 1975

MUKANDA

Kulemba cha Mose, mutu wa Zambi.

¹ Mwene, yena kuwapwa chiswamo chetu ku yisemuko yeswe.

² Shimbu milundu kanda yichisemuka. Shimbu kanda uchitomba mavu ni hashi. Chize ku miaka ya mutolo ndo ku miaka ya mutolo, yena uli Zambi.

³ Wakuhilwisa mutu ku fufuta. Wakwamba ngwe, Hilukenu ana ja atu.

⁴ Mumu kanunu ka miaka ku meso je kanapu ngwe tangwa lia zau muze hiliapalika. Kanapu ngwe ola ya kalayi ha ufuku.

⁵ Mumu wakwahungumuna ngwe ni sanga lia meya. Kanapu ngwe tulo. Ha chimene kanapu ngwe mwambu uze unasoko.

⁶ Chimene unasoko ni kutatuka; ha chingoloshi hauteta, hiwalela.

⁷ Mumu utenu we hiwatwonwona. Mu ufwatulo we tunalipikala.

⁸ Hiunase uhenge wetu kumeso je; milonga yetu ya kuhengama yinasoloka mu pangu lia meso je.

⁹ Mumu matangwa jetu eswe hahwa ni ufwatulo we. Twakumanununa miaka yetu ngwe chishima.

¹⁰ Miaka yetu yapwa makumi shimbiali a miaka, hanji mumu ha tachi muyipwa makumi nake. Hindu kulenga chayo chinapu kuhondangana ni chinyengo wika, mumu yakuhwa nikawashi ni yetu mutuhumuka.

¹¹ Iya manyingika ndundo ja utenu we ni ufwatulo we nikulita ni woma uze makuvwila?

¹² Chocho Utulongese kwalula matangwa jetu, hanga tukasele mbunge jetu ku mana.

¹³ Hiluka kama Yehova! Ndo mwiji muka? Uchilikonyeke kama ha kutwala kuli tuvumbi twe.

¹⁴ Utuyukise kama ha chimene ni utu wa zango lie, hanga tukawahilile ni chiseke matangwa jetu eswe.

¹⁵ Utwehe kuwaha nikulita ni matangwa aze watulambile, nikulita ni miaka yize twamwene yipi.

¹⁶ Yitanga ye yikasoloke kuli tuvumbi twe. Uhenya we ukapwe hali ana je.

¹⁷ Upeme wa Yehova Zambi yetu ukapwe hali yetu, ukolese milimo ya moko jetu hali yetu. Ewa, milimo ya moko jetu uyikolese.