Miaso (Masamu) 9 - MUKANDA USANDU WA ZAMBI 1975

¹ Mungusakwila Yehova ni mbunge yami yeswe. Mungwambujola yitanga ye yeswe ya kukomwesa.

² Munguwahilila, mungulikwiza muli yena. Mungwimba uhaliso ku jina lie, yena mwe Chitunda.

³ Muze akwa kole jami machinduluka, kumatalinga, kumakuwa kumeso je.

⁴ Yena hiwakolesa upatwilo wami ni chikuma chami. Watwamine ha ngunja nikupatula ni ululi.

⁵ Hiunakanjisa mavungu; hiunonwona yingulungulu; hiunajimuna majina jo ku miaka ya mutolo.

⁶ Mwe mukwa kole hanamwenyeka. Kwonwona cha ku miaka ya mutolo. Yihunda yize hiunamwanga, chipwe chinyingi chayo hichinatoko.

⁷ Alioze Yehova katwama mwanangana ku miaka ya mutolo: hanalulika ngunja yenyi ha upatwilo.

⁸ Iye kumakasopesa akwa hashi ni ululi; kumakapatwila akwa mavungu nikulita.

⁹ Yehova kumakapwa kaposhi wa kuswamina hali waze akumona yihungumiona; kumakapwa chiswamo ha matangwa a lamba.

¹⁰ Waze ananyingika jina lie kumafuliela muli yena; mumu yena, Yehova, kushi kwehuka waze akukufupa.

¹¹ Imbenu miaso ya kuhalisa Yehova yoze watwama mu Zaione. Ambululenu yilinga yenyi hakachi ka atu.

¹² Muze masopesa akwa kumwanga manyinga kumakaewuluka; keshi kuvulama muteto wa akwa luyinda.

¹³ Nguvwile kama vumbi, Yehova; nyonga lamba liami lize akunguvwisa akwa kole jami, yena kuwakunguchiza ku chikolo cha kutwa;

¹⁴ Hanga ngukambujole lufuma we mweswe mu yikolo ya mwana wa pwo Zaione. Kumunguwahilila mu ulamwino we.

¹⁵ E mavungu hanashimbama mu wumbu lize afulile. Mu wanda uze atanjilikile, kulu lio ene hiliakwachika.

¹⁶ Atu kakunyingika Yehova mu upatwilo uze kakupatula; mwe chingulungulu hakwachika mu yitanga ya moko jenyi mwene. (Pukuna. Litulike.)

¹⁷ Yingulungulu kumakaambila mu Shiole, ewa, ni mavungu eswe akavulama Zambi.

¹⁸ Mumu mukwa kuyindama keshi kumuvulama matangwa eswe; kutalatala cha mwe chimbovu kuchishi kutoka liakulu.

¹⁹ Katuka kama Yehova! Kanda utayiza atu kukumba. Akasopese mavungu kumeso je.

²⁰ Uakolese woma Yehova, hanga mavungu alinyingike ngwo, Tuli atu tuhu.(Litulike.)