Miaso (Masamu) 89 - MUKANDA USANDU WA ZAMBI 1975

Masakile ya Etane Ka-Ezera.

¹ Kumungwimbila utu wa zango lia Yehova ku miaka ya mutolo. Ni kanwa liami mungwambulula umwenemwene we ku yisemuko yeswe.

² Mumu nambile ngwami, Utu wa zango maukolesa wa mutolo; umwenemwene we maukolesa ndo ku malilu.

³ Hingunakolesa usendo ni yoze namutongwele. Hingunalilakenya ni shingo kuli kavumbi kami David.

⁴ Munyachi we munguukolesa wa mutolo. Ngunja ye munguyitakamisa ku yisemuko yeswe.(Litulike.)

⁵ Yehova, malilu kumakachichimieka yikomokeso ye, hamuwika ni umwenemwene we mu chikungulwila cha asandu.

⁶ Helu lia malelwa iya malitesa ni Yehova? Iya hakachi ka akwa ndundo malifwa ni Yehova?

⁷ Hakachi ka punga ya asandu Zambi kapwa kole ni woma. Hakachi ka waze eswe anamujingilika iye chatamba kumuvwila woma kuhiana.

⁸ Yehova Zambi-wa-Tujita, iya mapwa mukwa ndundo wa kulifwa ni yena Yehova? Umwenemwene we unakujingilika.

⁹ Wakuyula kulengumuka cha kalunga-lwiji. Muze mikanya yaho yazunduka yena mukayiholesa.

¹⁰ Wamakwine Rahape tuyipinji ngwe yoze hamushiha. Wamwangine akwa kole je ni kwoko lia tachi je.

¹¹ Malilu ninye, ni hashi nawa. Muno-muze ni yuma yeswe yatwamamo yena wayikolesele.

¹² Ya Norte ni Sule yena wayitangile. Tabore ni Hermone yinawahilila mu jina lie.

¹³ Kwoko lia ndundo ukwete. Kwoko lia Hapwa lia tachi; kwoko lie lia chindume kulianangama.

¹⁴ Ululi ni upatwilo wapwa ngwe fundamentu ya ngunja ye. Utu wa zango wakwenda hamuwika ni umwenemwene kumeso je.

¹⁵ Kawaha atu aze ananyingika liji lia kuwaha. Kakwenda mu pangu lia meso ja yena Yehova.

¹⁶ Kakuwahilila mu jina lie tangwa lieswe nganganga. Kakwanangamisa mu ululi we.

¹⁷ Mumu yena uli uhenya wa tachi jo. Mu vumbi lie mbinga yetu muyikanangama.

¹⁸ Mumu lukepwe wetu wa mbala wa Yehova. Mwanangana wetu wa mbala wa mwe Musandu wa Izalele.

¹⁹ Mba wahanjikile mu usolwelo kuli musandu we. Wambile ngwe, Hinakwasa umwe mukwa ndundo; hinanangamisa umwe wa kutongola hakachi ka atu.

²⁰ Hinawana David kavumbi kami; hinamuwayisa ni maji asandu.

²¹ Kwoko liami mulikatakama nenyi. Kwoko liami nawa mulikamutakamisa.

²² Niumwe mukwa kole mahasa kumwonga. Ana ja ungulungulu kechi kuhasa kumupinjisa.

²³ Akwa kulimika nenyi mungwalamba hashi kumeso jenyi. Waze akumuvwila kole mungwalamba.

²⁴ Alioze umwenemwene wami ni utu wa zango liami muyikatwama nenyi. Makanangamisa mbinga yenyi mu jina liami.

²⁵ Kumungusa kwoko lienyi ha kalunga-lwiji; kwoko lienyi lia chindume mungulisa ha njiji.

²⁶ Kumakateta kuli yami ngwenyi, Yena uli tata, kanda Zambi yami, kanda liwe lia ulamwino wami.

²⁷ Kumungumupwisa mwanami mutangu, yoze wanangama kuhiana mianangana a hashi.

²⁸ Mungumutungila utu wa zango liami ku miaka ya mutolo. Usendo wami muukakola nenyi.

²⁹ Munyachi wenyi munguupwisa wa mutolo. Ngunja yenyi muyilinduluka matangwa eswe a mwilu.

³⁰ Nyi ana jenyi mehuka shimbi jami, hanji kechi kwenda nikulita ni upatwilo wami,

³¹ nyi matangula yiyulo yami, hanji kechi kufunga shimbi jami.

³² Mba mungukanjisa Utanguko wo ni mbwechi, uhenge wo munguukanjisa ni mijiji.

³³ Hindu chichi kumuchiza liakulu utu wa zango liami. Umwenemwene wami chichi kuutayiza kuhona.

³⁴ Chichi kutangula usendo wami. Chichi kwalumuna chuma chize hichinapalika ku mivumbo yami.

³⁵ Kamuwika kunahu hingunalishingi ni usandu wami. Chichi kuhanjika mahuza kuli David.

³⁶ Munyachi wenyi muukalinduluka ku miaka ya mutolo. Ngunja yenyi muyikalinduluka miaka yeswe ya lie tangwa kumeso jami.

³⁷ Kumakayikolesa ku miaka ya mutolo ngwe kakweji; ngwe chela wamwenemwene mu tetela.(Litulike.)

³⁸ Alioze hiunambila, hiunalitunu, hiunatenuka ni yoze wamuwayishile ni maji.

³⁹ Hiunavwila kupiha usendo wa kavumbi ke. Hiunajilula chipangula chenyi ndo ku mavu lume.

⁴⁰ Hiunapuzula yipanga yenyi yeswe. Mbonge jenyi hiunajijindwola.

⁴¹ Waze eswe anapalika mu jila anamupupu. Hanalumuka ngwe luchoko kuli waze atunga no.

⁴² Hiunanangamisa kwoko lia chindume lia akwa kulimika nenyi. Akwa kole jenyi eswe hiunahe kuwahilila.

⁴³ Ewa, hiwafuwisa lutwilo wa katana kenyi. Kwamujikijishile mu jita.

⁴⁴ Hiunajimisa kupeyima chenyi. Hiunanungwina hashi ngunja yenyi.

⁴⁵ Matangwa ja ukweze wenyi hiunaatepulula. Hiunamukolesa sonyi.(Litulike.)

⁴⁶ Yehova, ndo mwiji muka? Kuswama che muchipwa cha mutolo nyi? Ndo mwiji muka ufwatulo we muulekwoka ngwe kahia?

⁴⁷ Iwuluka kama kuhiha cha mwono wami. Watangile ana eswe a atu amokomoko chize!

⁴⁸ Mutu muka malinduluka ni mwono keshi kumona kufwa? Iya yoze mapulula mwono wenyi ku chiyulo cha Shiole?(Litulike.)

⁴⁹ Mwene, utu wa zango lie ukulu ulihiwo? Uze walakenyene ni shingo kuli David mu umwenemwene we.

⁵⁰ Mwene, iwuluka chize akuchoka tuvumbi twe, chize nakumbata mu tulo yami kuchoka cha atu anji,

⁵¹ chize akwa kole je hachoka nacho Yehova. Chize hachoka nacho kwenda cha yoze wamuwayishile ni maji.

⁵² Yehova akafumane ku miaka ya mutolo. Amene ni Amene.