Miaso (Masamu) 88 - MUKANDA USANDU WA ZAMBI 1975

Mwaso. Samu lia ana a Kora. Kuli Njimba mukwa lutwe ha Mahalate Leanote. Masakile ya Hemane Ka-Ezera.

¹ Yehova, Zambi ya ulamwino wami, ngunatete kuli yena ni mwalwa ni ufuku.

² Kulemba chami chikanjile kumeso je. Hetamisa kama twitwi lie ku muteto wami.

³ Mumu mbunge yami yazala tò ni lamba. Mwono wami wakundama ku Shiole.

⁴ Hanangwalula hamwe ni waze akupalumuka ku jondo. Napwa ngwe yoze keshi chikwashi,

⁵ yoze hamumbila hakachi ka afu, ngwe waze kaashiha anapombo mu fuka, waze kushi kwewuluka. Hanaapatula ku kwoko lie.

⁶ Hiunanguse mu jondo yize yahiana kusuha; kuma kwa milima, he ha mashima.

⁷ Ufwatulo we unangushate chikolo. Hiunangulambe ni mikanya ye yeswe.(Litulike.)

⁸ Waze nalikachile no hiunaatwala kusuku ni yami. Hiunangupwisa ngwe chuma cha kuzelwokesa kuli ayo. Hananguyiki, chahashile kutuhuka.

⁹ Liso liami linasangunuka ni yikola. Yehova, hinateta kuli yena tangwa ha tangwa. Hinazoza moko jami kuli yena.

¹⁰ Te kumukasolola yikomokeso kuli afu nyi? Yizulie muyikahinduka yikakuhalise nyi?(Litulike.)

¹¹ Utu wa zango lie makawambulula mu fuka nyi? Hanji umwenemwene we makawambulula mu Apandone nyi?

¹² Yikomokeso ye mayinyingika mu milima nyi? Hanji ululi we maunyingika mu chifuchi cha mavulie nyi?

¹³ Alioze nakuteta kuli yena Yehova. Ha chimenemene kulemba chami muchiheta kumeso je.

¹⁴ Yehova, kuchi te unambila mwono wami? Kuchi te unanguswekela meso je?

¹⁵ Chize ku wanuke wami nguli mukwa lamba; kunamba kufwa. Ngunalipikala ha kwivwa mwongo wa yena.

¹⁶ Ufwatulo we usasu unangulundumukina. Yuma ye ya kuvwisa mwongo hiyanguteta ngwi.

¹⁷ Yangujingilikile tangwa lieswe nganganga ngwe meya. Anguselekele hamuwika.

¹⁸ Ni mukwa kunguzanga ni sepa liami hiunaatwala kusuku ni yami. Waze nalikachile no waatwala ku milima.