Miaso (Masamu) 85 - MUKANDA USANDU WA ZAMBI 1975

¹ Yehova hiunavwila vumbi chifuchi che. Hiunahilwisa funge ja kuli Yakomba.

² Hiunakonekena atu je uhenge wo. Hiunafuku shili yo yeswe.(Litulike.)

³ Hiunachiza ufwatulo we weswe. Hiunatewuluka ku kusasaminya cha utenu we.

⁴ Tutewulule kama, yena Zambi ya ulamwino wetu, utenu we kuli yetu ukahwe kama.

⁵ Kumutenuka ni yetu ndo ku miaka ya mutolo, nyi? Kumukalindulula utenu we ku yisemuko yeswe, nyi?

⁶ Kushi kutuhuzulula nawa hanga atu je akawahilile muli yena, nyi?

⁷ Yehova, Utulweze utu wa zango lie, Utwehe kama ulamwino we.

⁸ Kumungwivwa chize Zambi Yehova mamba, mumu kumamba sambukila kuli atu jenyi ni kuli asandu jenyi. Alioze kanda atewulukila nawa ku uhepuke.

⁹ Chamwenemwene ulamwino wenyi hakamwihi uli ni waze akumuvwila woma, hanga ulemu ukapwe mu chifuchi chetu.

¹⁰ Utu wa zango ni umwenemwene hiyinatakana hamuwika. Ululi ni sambukila hiyinalimeneka.

¹¹ Umwenemwene muusoka hashi. Ululi kwilu hiwatala hashi.

¹² Ewa, Yehova kumahana chize Chinapeme, mba chifuchi chetu muchikahana mbuto ya kulumbama.

¹³ Ululi muukamutetekela. Kumakatwendesa mu jila ya ngano jenyi.