Miaso (Masamu) 83 - MUKANDA USANDU WA ZAMBI 1975

Mwaso. Samu lia Asafwe.

¹ Zambi, kanda uhola kulungunga. Zambi, kanda uliholela; kanda ulihulika.

² Mumu akwa kole je kanazungulukila. Waze eswe anakuvwila kole hahetula mitwe.

³ Kakutwama punga ya ukanyame atu je. Kakulitesa hamuwika cha kulimika ni atu je waze wakwasweka.

⁴ Hamba ngwo, Tatuyenu tukaatete munyachi wo, hanga jina lia Izalele kanda akaliwuluka nawa.

⁵ Mumu halitesa ni mbunge yimuwika. Kakukolesa usendo wa kulimika ni yena.

⁶ Mbalaka ja Endome, ni A-Ishemali, ni Moape, ni A-Hekare.

⁷ Ni Gepale, ni Amone, ni Amaleke, ni A-Filistea, ni waze atwama mu Teru.

⁸ Ashure hanalifutula no. Eswe hanakwase ana ja Lote.(Litulike.)

⁹ Linga no ngwe walingile kuli A-Mindiane, ni Sisera, ni Jabini ku lwiji wa Kishone.

¹⁰ Anongene ku Endore. Alumukine ngwe wilo wa kusa ha mavu.

¹¹ Pwisa yilolo jo ngwe Orepe ni Zepe, ewa, mianangana jo eswe akapwe ngwe Zeba ni Zalumuna.

¹² Waze ambile ngwo, Mazuwo a Zambi tukaatambule akapwe ninyetu.

¹³ Zambi yami Ukaapwise ngwe fufuta yize yinahehuka; ngwe yiswaswa ku fuji.

¹⁴ Ngwe kahia kaze kakwocha musenge; ngwe mulengi uze wakuchocheka kahia ku milundu;

¹⁵ Chocho ukaahange ni kakundukundu ke, ukaakolese woma ni kangonga ke.

¹⁶ Zalisa kumeso jo ni sonyi, hanga akafupe jina lia yena Yehova.

¹⁷ Akevwe sonyi, akalishimwoke ndo ku miaka ya mutolo. Ewa, akalitupieke, akanonge.

¹⁸ Akanyingike ngwo, Yena wika uli ni jina lia Yehova, uli mwe Chitunda helu lia hashi heswe. Kuli Njimba mukwa lutwe. Ha Ngitite. Samu lia ana a Kora.