Miaso (Masamu) 81 - MUKANDA USANDU WA ZAMBI 1975

Kuli Njimba mukwa lutwe ha Ngitite. Samu lia Asafwe.

¹ Imbenu mwilu kuli Zambi tachi jetu. Twilenu ngunda Zambi ya Yakomba.

² Imbenu mwaso; nehenu kakolondondo, ni kalialia mupema, ni yisaji ya kusa.

³ Humunenu chitavwi ha kakweji mwaha, ha hakweji wa kuunduka, ha chiwanyino chetu.

⁴ Mumu chapwa shimbi kuli A-Izalele ni chiyulo cha Zambi ya Yakomba.

⁵ Wachisele ngwe Shindakenyo kuli José muze apalikile ha chifuchi cha Engitu. Kuze nevwile limi chalinyingikine.

⁶ Nachijile chiteli ku chipaya chenyi moko jenyi atusukile ku chisoka.

⁷ Watambikile mu lamba ni yami nakupulwile. Nakukumbulwile muma mwa kuswama mwa kukulunguza. Nakwesekele ku meya a Meripa.(Litulike.)

⁸ Ivwenu atu jami mba mungukushindakenya Izalele! Nyi kachi wakungwivwa yami!

⁹ Kachi niumwe zambi ya tundaka keshiko hakachi kenu. Chipwe kuwayila umwe zambi ya tundaka kachi kunwachilingile.

¹⁰ Yami nguli Yehova Zambi ye, nakuchijile ku chifuchi cha Engitu. Pakula kanwa lie liakulu mba mungulizalisa.

¹¹ Hindu atu jami kapanjikile liji liami. Izalele kangutayijile.

¹² Kashika naakunjikile ku pami ja mbunge jo, hanga akende nikulita ni yiyulo yo ene.

¹³ Atu jami, kachi mangwivwa! Izalele, kachi menda mu majila jami!

¹⁴ Kachi nikawashi munguzeyesa akwa kole jo. Kachi mungusa kwoko liami lia kulimika ni waze akulimika no.

¹⁵ Akwa kole ja Yehova kachi heza nikuliumba kuli iye, alioze shimbu lio mulipwa lia mutolo.

¹⁶ Kumakaalisa ni tiliku lize liahiana kupema. Kumungukakuyukisa ni wuchi wa ku liwe.