Miaso (Masamu) 80 - MUKANDA USANDU WA ZAMBI 1975

¹ Panjika kama, yena Kafunga ka Izalele. Yena wakutetekela José ngwe chendo cha yimuna. Panguluka kama yena wakutwama hakachi ka akerupime.

² Kumeso ja Eframe, ni Mbenjamine, ni Manase, sunga ndundo je, wize utulamwine.

³ Zambi, ututewulule kama, pangulwisa meso je mba mutupuluka.

⁴ Yehova Zambi-wa-Tujita, ndo mwiji muka mukatenuka ni kulemba cha atu je?

⁵ Hiunaalisa kulia cha masoji. Hiunaanwisa masoji a kulumbama.

⁶ Hiunatutenge ngwe Chizungozungo hakachi ka waze twatunga no. Akwa kole jetu kanasehe hakachi ko.

⁷ Ututewulule nawa, Zambi-wa-Tujita. Pangulwisa kama meso je mba mutupulluka.

⁸ Wachijile chinjinda cha uva ku Engitu. Wahumine mavungu ukachitumbe.

⁹ Walulikile muhela wacho. Chatanjile miji; chazalishile chifuchi.

¹⁰ Milundu yalayile ni Chizulie chacho. Mitango yacho yapwile ngwe misedru ya Zambi.

¹¹ Chatanjishile mitango yacho ndo ku kalunga-lwiji; ana jacho ahetele ndo ku Lwiji.

¹² Kuchi te hiwapuzula lusaso wacho, hanga waze eswe anapalika akachihele mihuko?

¹³ Chombo wa mu musenge kakuchiwonda. Ngongo eswe a mu chana anachili.

¹⁴ Zambi-wa-Tujita, tunaliumbu, utewulukile nawa. Kwilu watwama, tala hashi, umone, uhete ku chinjinda chino,

¹⁵ chitondo chino kwolo lie lia chindume liatumbile; mutango uno watakamishine hali yena mwene.

¹⁶ Hachocha ni kahia; hachiteta. Kanakuwu mumu ha kwambila cha ku meso je.

¹⁷ Kwoko lie likapwe hali mutu wa chindume che; hali mwana mutu yoze wamutakamisa hali yena mwene.

¹⁸ Chocho kutuchi kuya kunyima kukuhichika yena. Utuhuzulule mba mututambika ha jina lie.

¹⁹ Yehova Zambi-wa-Tujita, ututewulule kama. Pangulwisa meso je mba mutupuluka.