Miaso (Masamu) 79 - MUKANDA USANDU WA ZAMBI 1975

Samu lia Asafwe.

¹ Zambi, akwa mavungu hanjila mu chihinga che. Hanajitula tembele ye yisandu. Hapwisa Yerusaleme yikulu.

² Mijimba ya tuvumbi twe aze hanafu hanayipwisa kulia cha tujila a mu tetela. Musunya wa asandu je hanaupwisa kulia cha tushitu a hashi.

³ Hanamwange manyinga jo ngwe meya ha kujingilika Yerusaleme, ni mukwa kwafunda wakuhi.

⁴ Hitunasauka hakachi ka waze twatunga no. Hanatulenye nikutuchimbunguna kuli waze anatujingilika.

⁵ Yehova, ndo mwiji muka? Mukatenuka ku miaka ya mutolo, nyi? Ukwa we muuyila ngwe kahia, nyi?

⁶ Zukwila kama ufwatulo we hali mavungu waze kakunyingikine, hali waze keshi kutambika ha jina lie.

⁷ Mumu hanali Yakomba nikwenyeka chihela chenyi cha kutwama.

⁸ Uhenge wa akaka kanda uwiwuluka kama wa kulimika ni yetu. Keke ye ya vumbi yikeze nikawashi kutupatwiza mumu hanatulelesa chikolo.

⁹ Zambi ya ulamwino wetu, utukwase kama mumu ha ulemu wa jina lie. Utupulule, utupemese ku milonga yetu mumu ha jina lie.

¹⁰ Kuchi te akwa mavungu mamba ngwo, Zambi yo Ulihiye? Kukala cha manyinga aze anamwangana a tuvumbi twe, akachinyingike hakachi ka mavungu kumeso jetu.

¹¹ Mikuma ya funge yikahete kuli yena. Nikulita ni unene wa ngolo je funga kanawa waze hiunaafunjikila kufwa.

¹² Mwene, hana yisuho shimbiali kuli waze twatunga no, mwe mu tulo yo, kuchoka chize hakuchoka nacho yena.

¹³ Chocho yetu atu je kanda mapanga a kelo je mutukusakwilila ku miaka ya mutolo. Chocho mutusolola uhaliso kuli yena ku yisemuko yeswe. Kuli Njimba mukwa lutwe. Ha Shoshanime-Etutu. Samu lia Asafwe.