Miaso (Masamu) 78 - MUKANDA USANDU WA ZAMBI 1975

Masakile ya Asafwe.

¹ Atu jami panjikenu ku shimbi jami; hetamisenu matwi jenu ku maliji a mu kanwa liami.

² Mungupakula kanwa liami ni chishima. Mungwambulula yijimbikilo ya shakulu,

³ yize hitunayivu, hitunayinyingika, akaka hatwambulwilayo.

⁴ Kutuchi kuyisweka kuli ana jo. Mutwambulula ku chisemuko chize chinezaho uhaliso wa Yehova, ni tachi jenyi, ni yitanga yenyi ya kukomwesa yize hanalingi.

⁵ Mumu hanakolesa Shindakenyo muli A-Yakomba. Hanafunjika shimbi muli A-Izalele, yize ambile kuli akaka hanga o akayambulule kuli ana jo.

⁶ Hanga chisemuko chize chinezaho akayinyingike, chipwe ana aze meza kusemuka hanga o nawa akayambulule kuli ana jo.

⁷ Hanga akasele kutalatala cho muli Zambi, nikuvulama yitanga ya Zambi ka, alioze akafunge shimbi jenyi.

⁸ Kuchina mapwa ngwe akako, chisemuko cha pami ni uhulia; chisemuko cha waze kasele mbunge jo kanawa; Spiritu jo kujajikijilile kuli Zambi.

⁹ Ana ja Eframe chipwe ni yitwa yo ni mata jo, hindu ahilukile kunyima mu tangwa lia jita.

¹⁰ Kafungile usendo wa Zambi. Kasolo kwenda mu shimbi jenyi.

¹¹ Avulamine yilinga yenyi, ni yitanga yenyi ya kukomwesa yize aalwezele.

¹² Yikomokeso alingile kumeso ja akako mu chifuchi cha Engitu, mu chifuchi cha Zoane.

¹³ Wapulile kalunga-lwiji nikwapalikisamo ndusu. Walumbikile meya ngwe mulumba.

¹⁴ Ha mwalwa nawa waasongwelele ni lelwa. Ha ufuku waasongwelele ni pangu lia kahia.

¹⁵ Wapulile mawe mu puya. Waahele meya a kunwa a kulumbama ngwe a mu mashima.

¹⁶ Watuhwishile tuzololo nawa mu liwe. Wapukwile meya ngwe njiji.

¹⁷ Hindu awezele nawa kumuvulumuna, nikukatukila mwe Chitunda mu puya.

¹⁸ Esekele Zambi mu mbunge jo ha kwita yifwo ya usolo wo.

¹⁹ Ewa, ahanjikile cha kulimika ni Zambi. Ambile ngwo, Te Zambi mahasa kutwalila mesa mu puya?

²⁰ Ngwo, Walambile liwe mba meya apukukile, yitwetwe yasupwokele, alioze mahasa kutwaha mbolo nawa, nyi? Mahasa kuwana yifwo ya kulia atu jenyi?

²¹ Kashika Yehova wevwile, wapwile ni ufwatulo. Awikile kahia ka kulimika ni Yakomba. Utenu nawa wafwinjile wa kulimika ni Izalele.

²² Mumu kafulielele muli Zambi. Kajikijilile mu ulamwino wenyi.

²³ Hindu wambile malelwa kwilu; wazulwile mapito a malilu,

²⁴ Waanokesene maná akalie. Waahele mbuto ya mwilu.

²⁵ Atu alile kulia cha akwa ndundo. Waahele kulia cha kulumbama.

²⁶ Wanehene fuji ya ku Chivumbuko yipalike mwilu. Wasongwelele fuji ya ku Sule ni ngolo jenyi.

²⁷ Waanokesene yifwo ngwe fufuta. Waahele tujila a mapulwa ngwe masekeseke a kalunga-lwiji.

²⁸ Wayiholwelele hakachi ka chilombo cho, kwa kujingilika mazuwo jo.

²⁹ Chocho alile, akuchile kanawa. Waahele chize achivwilile usolo.

³⁰ Usolo wo te kanda uhwa; kulia te muchili mu makanwa jo,

³¹ muze utenu wa Zambi wafwinjile wa kulimika no, nikushiha akwa kutoha hakachi ko, nikulamba hashi akweze a Izalele.

³² Chipwe chocho, avulumwine hindu. Kafulielele yitanga yenyi ya kukomwesa.

³³ Kashika wajimwine matangwa jo ngwe mwiku. Walalishile miaka yo ni mwongo.

³⁴ Muze aashihile mba ahulile ha kutwala kuli iye. Ahilukile nikufupa Zambi ni mbunge yeswe.

³⁵ Ewulukile ngwo, Zambi iye liwe lietu. Ngwo, Zambi mwe Chitunda iye Mukwa-Kutukula.

³⁶ Alioze amupepiekele ni makanwa jo. Ahanjikile mahuza kuli iye ni malimi jo.

³⁷ Mumu mbunge jo kujalulamine nenyi. Kashishikile mu usendo wenyi.

³⁸ Alioze iye nikwivwa keke, waakonekenene uhenge wo, kaajimine. Ewa, kanji kanji watewulwile utenu wenyi; kasungile ufwatulo wenyi weswe.

³⁹ Wewulukile ngwenyi, O kapwa musunya wika; ngwe fuji yize muyipalika mba kuyichi kwiza nawa.

⁴⁰ Yisuho yipwa haha amukatukilile mu puya, nikumuvwisa kupiha mu makango.

⁴¹ Alumukine nawa nikweseka Zambi. Ehile mwe Musandu wa Izalele.

⁴² Kewulukile kwoko lienyi, chipwe tangwa lize waakulile kuli yoze walimikine no.

⁴³ Ngwe asele yilayi yenyi mu Engitu, ni yikomokeso yenyi mu chifuchi cha Zoane.

⁴⁴ Walumwine njiji jo manyinga. Yitwetwe yo wayalumwine hanga kechi kuhasa kunwinamo meya.

⁴⁵ Watumine hakachi ko mazaji a jiji aze aasuminesumine, ni yula-ya-mbwota aze aenyekene.

⁴⁶ Wahanyine kwoka cha mbuto yo kuli yiminguna. Kukilikita cho wachihanyine kuli makumbi.

⁴⁷ Wenyekene yinjinda yo ya uva ni chiwe. Misuwa yo wayenyekene ni chishika.

⁴⁸ Wakunjikile yimuna jo ku chiwe, ni yendo yo ya yimuna kuli njaji ya kahia.

⁴⁹ Wazukwile hali ayo kusasaminya cha utenu wenyi, ni ufwatulo, ni kuzangumioka, ni lamba; chihuji cha angelo api.

⁵⁰ Wapulile jila ya utenu wenyi. Kafungile mbunge jo ku kufwa. Wahanyine mwono wo ku chilungo.

⁵¹ Walambile atangu kusemuka a mu Engitu, waze ahiana tachi mu mbalaka ja Hame.

⁵² Alioze watetekelele atu jenyi ngwe mapanga. Waasongwelele ngwe chendo cha yimuna mu puya.

⁵³ Waatwalile kawape, chocho kevwile woma, alioze kalunga-lwiji wazemwine akwa kole jo.

⁵⁴ Waanehene ku njiza ya muma mwenyi musandu, ku mulundu wenyi uze kwoko lienyi lia chindume lialanjile.

⁵⁵ Wahumine mavungu kumeso jo nikwahana ngwe chihinga cha kweseka ni mihipu. Wanjishile minyachi ya Izalele akatwame mu mbalaka jo.

⁵⁶ Hindu esekele mwe Chitunda nikumukatukila. Kafungile Shindakenyo jenyi.

⁵⁷ Ahilukile kunyima; alingile ni mafwefwe ngwe akako; apiasukile ngwe uta wa kwonga.

⁵⁸ Mumu amwihile atenuke ni milundu yo ya kunangama. Amunehenene ukwa tuponya two twa kwola.

⁵⁹ Muze Zambi wachivwile, wevwile ufwatulo. Wevwilile kupiha chinji A-Izalele.

⁶⁰ Chocho wehukile tabernakulu ya Shilo; mbalaka yize asele hakachi ka atu.

⁶¹ Wakunjikile tachi jenyi ku ufunge. Uhenya wenyi waukunjikile mu moko ja akwa kulimika nenyi.

⁶² Wahanyine atu jenyi ku katana. Wevwile ufwatulo ni chihinga chenyi.

⁶³ Kahia kalalishile akweze jo. Ana-mapwo jo kapwile ni mwaso wa umbachiso.

⁶⁴ Asasendote afwile ku katana; tuliwa jo kalilile mbimbi.

⁶⁵ Henaho Mwene walawile ngwe mu tulo; ngwe umwe mukwa tachi yoze unakalumioka ha mukunda wa vinyu.

⁶⁶ Walambile kunyima akwa kulimika nenyi. Waahele kusauka cha mutolo.

⁶⁷ Chikwo nawa walitunyine mbalaka ya José. Katongwele vungu lia Eframe.

⁶⁸ Alioze watongwele vungu lia Yunda, mulundu wa Zaione uze azangile.

⁶⁹ Watungile muma mwenyi musandu ngwe milundu yisuku, ngwe hashi ahakolesele ku miaka ya mutolo.

⁷⁰ Watongwele nawa David kavumbi kenyi, wamuchijile hakachi ka malimba a mapanga.

⁷¹ Wamuchijile kuze afungile mapanga aze akwamwisa ana, akalise A-Yakomba atu jenyi, A-Izalele chihinga chenyi.

⁷² Chocho waalishile nikulita ni kutuwika cha mbunge yenyi, waasongwelele nikulita ni utotombo wa moko jenyi.