Miaso (Masamu) 77 - MUKANDA USANDU WA ZAMBI 1975

Kuli Njimba mukwa lutwe. Nikulita ni Yedutune. Samu lia Asafwe.

¹ Munguteta kuli Zambi ni liji liami, ewa, kuli Zambi munguteta ni liji liami mba iye mapanjika kuli yami.

² Ha tangwa lia lamba liami nafupile Mwene. Nazozele kwoko liami ha ufuku nikukokoloka ka. Mbunge yami te kuyisolo kuhwima.

³ Ngunewuluka Zambi nikulipikala. Ngunalinyenge; mbunge yami yinalezumuka.(Litulike.)

⁴ Yena wakukwata meso jami akulaula. Nalipikala naye chocho Chahashile kuhanjika.

⁵ Hinanyonga ha matangwa a kushi, ha miaka ya shakulu.

⁶ Nakwiwuluka mwaso wami wa ufuku. Nakulishimwinya ni mbunge yami; spiritu yami kuyakufupafupa kanawa.

⁷ Te Mwene mambila ku miaka ya mutolo nyi? Kechi kwivwa nawa vumbi, nyi?

⁸ Utu wa zango lienyi hiwahwa ndo ku miaka ya mutolo, nyi? Chilakenyo chenyi muchifwa ndo ku miaka ya mutolo, nyi?

⁹ Zambi te hanavulama kupwa ni vumbi, nyi? Te ha kutenuka hayika keke yenyi, nyi?(Litulike.)

¹⁰ Mba nambile ngwami, Uno musongo wami, alioze mungwiwuluka miaka ya kwoko lia chindume lia mwe Chitunda.

¹¹ Munguvuluka yitanga ya Yehova, mumu mungwiwuluka yikomokeso ye ya shakulu.

¹² Mungupukuna nawa ha milimo ye yeswe, nikunyonga ha yitanga ye.

¹³ Zambi, jila ye muma musandu yili. Iya mapwa zambi munene wa kulifwa ni Zambi?

¹⁴ Yena uli Zambi yoze wakulinga yikomokeso. Hiwasolola tachi je hakachi ka atu.

¹⁵ Yena ni kwoko lie hiwakula atu je, ana ja Yakomba ni José.(Litulike.)

¹⁶ E meya akumwene, Zambi. E meya akumwene, mba evwile woma. Majinga nawa achikimine.

¹⁷ Malelwa atehwine meya. Malilu atuhwishile lundunjila. Mivu ye nawa yendele kweswe.

¹⁸ Liji lia kukulunguza che liapwile mu chijimbi. Mihenyo ye yapangulwishile hashi. Mavu achikimine ni kulinyika.

¹⁹ Jila ye yapwile mu kalunga-lwiji. Majila je apwile mu meya anene. Ngano je kajinyingikine.

²⁰ Watwalile atu je ngwe chendo cha yimuna, ku kwoko lia Mose ni Arone.