Miaso (Masamu) 76 - MUKANDA USANDU WA ZAMBI 1975

Kuli Njimba mukwa lutwe, ha tulialia a kusa. Samu lia Asafwe. Mwaso.

¹ Zambi kanamunyingika muli A-Yunda. Jina lienyi kuliatoha muli A-Izalele.

² Mbalaka yenyi yili mu Saleme; zuwo lienyi lili mu Zaione.

³ Kwe kuze amakwine mivu ya uta, ni lukepwe, ni katana, ni jita.(Litulike.)

⁴ Uli mukwa uhenya, uli mupema aahiana milundu kuze akukwachila atu.

⁵ Waze atakama mu mbunge hanaapupu; hanayi tulo two. Niumwe hakachi ka akwa ndundo kawanyine moko jo.

⁶ Zambi ya Yakomba! Ha kwambila cha yena, ni temba lia jita ni kavwalu haambila mu tulo twa kufwa.

⁷ Yena, yena mwene chatamba kukuvwila woma. Iya mamana kumeso je nyi hiwatenuka?

⁸ Wavwishile upatwilo wa kukatuka kwilu. Hashi hevwile woma; liaholele kulu,

⁹ muze Zambi akatukile mukupatula, akalamwine yimbovu eswe a hano hashi.(Litulike.)

¹⁰ Chamwenemwene ufwatulo wa atu muwiza kukuhalisa. Ufwatulo wasalaho mukalijichikawo.

¹¹ Lilakenyenu, nufwete kuli Yehova Zambi yenu. Waze eswe anamujingilika anehe milambu kuli yoze watela kumuvwila woma.

¹² Iye makapatula Spiritu ja yilolo; iye kumapwa mukwa kukolesa woma kuli mianangana a hashi.