Miaso (Masamu) 75 - MUKANDA USANDU WA ZAMBI 1975

Kuli Njimba mukwa lutwe. Ha Ala-tashete. Samu lia Asafwe. Mwaso.

¹ Tunasakwila kuli yena Zambi. Tunasakwila mumu jina lie hakamwihi lili, yitanga ye ya kukomwesa kuyakuchambulula.

² Muze munguwana mwaka wa kutongola mungupatula ni ululi.

³ Hashi hanasangunuka hamuwika ni waze atwamaho. Yami namikine manguji jaho.(Litulike.)

⁴ Nambile kuli akwa kulizata ngwami, Kanda nulizata. Kuli yingulungulu ngwami, Kanda nuhetula mbinga.

⁵ Kanda nuhetula mbinga mwilu, kanda nuhanjika nikukalisa kota.

⁶ Mumu kuhetula kuchichi kukatuka ku Chivumbuko chipwe ku Chitokelo, chipwe ku Sule, ka.

⁷ Alioze Zambi iye Chipatula-milonga, malelesa umwe, manangamisa mukwo.

⁸ Mumu musenge muuli mu kwoko lia Yehova ni vinyu yamo yinafuluka. Wapwa wa tò ni kuchinga, neye kumakautehuna. Chamwenemwene yisele yayo mayitehuna kuli yingulungulu a hashi akayinwe.

⁹ Alioze yami mungwambujola ku miaka ya mutolo; mungwimba uhaliso kuli Zambi ya Yakomba.

¹⁰ Mbinga jeswe ja yingulungulu mungujipatula, alioze mbinga ja akwa ululi kumajihetula.