Miaso (Masamu) 74 - MUKANDA USANDU WA ZAMBI 1975

Masakile ya Asafwe.

¹ Zambi, kuchi te watumbila ku miaka ya mutolo? Kuchi te utenu we unafwinji hali mapanga a kelo je?

² Iwuluka chikungulwila che chize walanjile ha shakulu; chize wakulile chikapwe vungu lia chihinga che; iwuluka mulundu wa Zaione kuze watwamine.

³ Kandwisa yiliato ye ku yikulu ya miaka, ku yipi yeswe mukwa kole halinga muma musandu.

⁴ Akwa kulimika ni yena hanakalumioka hakachi ka chikungulwila che; hanase yinyingi yo yikapwe yilayi.

⁵ Asotokele ngwe malunga aze azundwile njimbu jo ha usaki wa mitondo.

⁶ Yuma yeswe ya mutondo wa kwola hanayipuzula ni njimbu ni mihato.

⁷ Hanachocheka kahia muma mwe musandu. Hanajitula ndo ku mavu kuma kuze kwatwama jina lie.

⁸ Hanambe mu mbunge jo ngwo, Tukaenye hamuwika. Hanocho masunangonga eswe a Zambi mu chifuchi.

⁹ Kutwamwene yilayi yetu. Kukushi nawa profeta niumwe. Niumwe keshiko hakachi ketu yoze manyingika muze mwaka muusula.

¹⁰ Zambi! Ndo mwiji muka mukwa kulimika machoka? Mukwa kole kumakatuka jina lie ndo ku miaka ya mutolo nyi?

¹¹ Kuchi te wakuhilwisa kwoko lie, kwoko lie lia chindume? Lichize mu tulo ye ukaalalise.

¹² Hindu Zambi iye mwanangana wami wa shakulu; kakulinga ulamwino hano hashi.

¹³ Wapulile kalunga-lwiji ni tachi je. Watokwele mitwe ya tushitu anene a mu meya.

¹⁴ Wakulokola mitwe ya Leviatanu. Wamuhanyine akapwe kulia kuli waze atwama mu puya.

¹⁵ Wapulile fuji lia meya ni sanga lia meya; womishine njiji jinene.

¹⁶ Mwalwa niwe, ni ufuku nawa niwe. Hiwalulika lutemo ni tangwa.

¹⁷ Hiwafunjika manjiza eswe a hashi. Hiwatanga lwiza ni lushiho.

¹⁸ Iwuluka chuma chino, mukwa kole hachoka Yehova; vungu limwe lia yihepuke hatuka jina lie.

¹⁹ Kanda uhana kama mwono wa katele ke kuli ngongo. Kanda uvulama mwono wa yiswale je ndo ku miaka ya mutolo.

²⁰ Lemesa kama we usendo, mumu yihela ya milima ya hashi yazala tò ni mazuwo a upupilo.

²¹ Yoze unamono yihungumiona kanda ahiluka ni sonyi. Chiswale ni mukwa kuhona akahalise jina lie.

²² Zambi, katuka kama ulihakwile yena mwene. Iwuluka ngwe chihepuke kakukuchoka tangwa lieswe nganganga.

²³ Kanda uvulama liji lia akwa kulimika ni yena. Chimbangwinya cha akwa kukukatukila chakukakumuka matangwa eswe.