Miaso (Masamu) 73 - MUKANDA USANDU WA ZAMBI 1975

MUKANDA 3

Samu lia Asafwe.

¹ Chamwenemwene Zambi kakuwahisa Izalele, waze anapeme ku mbunge.

² Alioze yami, kwasala te hakehe kachi yiliato yami hiyaya. Shimbo jami te kwasala hakehe nikusenunuka.

³ Mumu nevwilile ukwa akwa kulizelula, ha kumona kuwaha cha yingulungulu.

⁴ Mumu ha kufwa cho keshi kupinda. Tachi jo jinakolo ngú.

⁵ Mumu keshi kumona lamba ngwe atu akwo; chikwo nawa keshi kwapinjisa ngwe atu akwo.

⁶ Kashika kulengumuka kuchaajingilika ku kota ngwe kalenge ka uhenya. Upupilo kuwapwa kuli ayo ngwe mazalo.

⁷ Meso jo kakututumioka ni maji. Yuma ali nayo kuhiana mbunge ya mutu muyihasa kunyonga.

⁸ Kakulenya; mu ungulungulu kakuvulwoka yuma ya kupinjisa. Kakuhanjika cha kulivwimba.

⁹ Kakusa makanwa jo a kulimika ni malilu. Malimi jo kakwendangana hashi heswe.

¹⁰ Kashika atu jenyi kakutewulukilako no kakwaha meya a ku musenge wa tò.

¹¹ Mba kakwamba ngwo, Zambi kuchi machinyingika? Te mwe Chitunda kakunyingika?

¹² Talenu, wano e yingulungulu, se kakuhwima matangwa eswe, kakwokesa upite.

¹³ Chamwenemwene nakatala tuhu kupemesa mbunge yami, nikusanyisa moko jami mu kulinanga.

¹⁴ Mumu tangwa lieswe nganganga kakungupinjisa, nikungufumba chimene ha chimene.

¹⁵ Nyi kachi nambile ngwami, Chocho mungwamba, kachi nalingile ni mafwefwe ku chisemuko cha ana je.

¹⁶ Muze nanyongene kunyingika chuma chino chapwile kukatala kumeso jami.

¹⁷ Ndo nanjilile muma musandu mwa Zambi, nikunyonga ha songo lio.

¹⁸ Chamwenemwene waasele ha yihela yize yasenena. Wakwanyasa ku kwonwona.

¹⁹ Susumuku hananongo. Hanatale wupu ni mwongo.

²⁰ Ngwe chilota muze mutu halaula, chocho yena Mwene, ha kulaula mukalelesa kaponya ko.

²¹ Kashika mbunge yami yalipikalile, angutwile muchima liami,

²² Mba napwile ngwe chishi mana, Chanyingikine nichimwe. Napwile ngwe kashitu kumeso je.

²³ Chipwe chocho nguli hamwe ni yena matangwa eswe, wakukwata kwoko liami lia chindume.

²⁴ Kumukangusongwela ni mana je, mba kulutwe kumukangutambula ni ulemu.

²⁵ Iya nguli nenyi mwilu shina yena wika? Chipwe hashi niumwe keshiho yoze namuzanga shina yena.

²⁶ Musunya wami ni mbunge yami yakulezumuka, alioze Zambi iye tachi ja mbunge yami. Iye chihanda chami ku miaka ya mutolo.

²⁷ Mumu waze ali kusuku ni yena kumakanonga. Wakwonwona waze eswe akukwehuka ngwe ni ukoi.

²⁸ Alioze chipema kuli yami kukundama kuli Zambi. Hinasa Ufulielo wami muli Mwene Yehova, hanga ngukambulule yitanga ye yeswe.