Miaso (Masamu) 72 - MUKANDA USANDU WA ZAMBI 1975

Samu lia Solomone.

¹ Zambi, hana kama yiyulo ye kuli mwanangana; hana ululi we kuli mwana wa mwanangana.

² Iye kumakapatwila atu je ni ululi; kumakapatwila yiswale je ni umwenemwene.

³ Milundu muyikaneha sambukila kuli atu, mindundena nawa mu ululi.

⁴ Kumakapatwila yiswale ja atu; kumakalamwina ana ja akwa kuhona. Kumakamakwona mukwa kuyindamisa.

⁵ Kumakakuvwila woma shimbu tangwa ni kakweji muyilinduluka, ku yisemuko ni yisemuko.

⁶ Kumakapwila ngwe vula ha mwambu wa kuteta, ngwe kavula ka kutuchikisa mavu.

⁷ Ha matangwa jenyi akwa ululi kumakawaha kulumbama cha sambukila ndo kakweji wakuhi nawa.

⁸ Kumakapwa ni chiyulo chize kukalunga-lwiji ndo ku kalunga-lwiji; chize ku Lwiji ndo ku masongo a hashi.

⁹ Akwa kutwama mu puya malihetamina kuli iye, akwa kole jenyi kumakalesa fufuta.

¹⁰ Mianangana a Tashi ni a ku matungu kumakamulambula. Mianangana a ku Shipa ni a ku Sepa makahana yawana.

¹¹ Ewa, mianangana eswe kumakafulamana kumeso jenyi. Mavungu eswe kumakamulingila.

¹² Mumu kumakapulula mukwa kuhona muze mateta; ni chiswale yoze keshi chikwashi.

¹³ Chiswale ni mukwa kuhona kumakaavwila keke. Kumakalamwina mwono wa waze anahono.

¹⁴ Kumakakula mwono wo ku yihungumiona ni uswi. Manyinga jo kumapwa alemu kumeso jenyi.

¹⁵ Kumakatwama ni mwono mba mahana kuli iye oru ya ku Shipa. Atu mamulembela matangwa eswe. Kumakamufumanyisa tangwa lieswe nganganga.

¹⁶ Kumukukapwa kulumbama cha mbuto mu mavu helu lia milundu. Mihuko yaho kumuyikanyika ngwe Lebano, waze atwama mu chihunda kumakatatuka ngwe mwambu wa hashi.

¹⁷ Jina lienyi kumulikalinduluka lia mutolo; jina lienyi kumulikalinduluka miaka yeswe tangwa mulikalinduluka. Atu eswe makaawahisa muli iye. Mavungu eswe makamuvuluka ngwo, Kawaha.

¹⁸ Yehova Zambi akawahe; mwe Zambi ya Izalele, e ukawenyi kakulinga yikomokeso.

¹⁹ Jina lienyi lilemu likafumane ku miaka ya mutolo. Hashi heswe hakazale tò ni ulemu wenyi. Amene ni Amene.

²⁰ Kulemba cha David mwana Yese hichahwa.