Miaso (Masamu) 71 - MUKANDA USANDU WA ZAMBI 1975

¹ Muli yena Yehova nasela Ufulielo wami; kanda uatayiza kungukolesa sonyi nilimwe tangwa.

² Ngupulule kama mu ululi we, ungulamwine. Hetamisa twitwi lie kuli yami, ungulamwine kama.

³ Upwe kuli yami ngwe uli luliwe lwami lwa kutwamamo, kwenako munguchinyina matangwa eswe. Hiwahana liji kungulamwina, mumu yena uli luliwe lwami kanda chiswamo chami cha tachi.

⁴ Zambi yami, ngupulule kama ku kwoko lia chingulungulu; ku kwoko lia chihenge kanda chiswi.

⁵ Mumu yena Yehova Mwene uli kutalatala chami. Nakujikijila kuli yena chize ku wanuke wami.

⁶ Yena wangukwachililile chize ku kusemuka chami. Yena wanguchijile mu jimo lia mama, kashika kuhalisa chami muchipwa kuli yena matangwa eswe.

⁷ Napwa ngwe nguli chikomokeso kuli anji, alioze yena uli uchinyino wami wa tachi.

⁸ Kanwa liami mulikazala tò ni uhaliso we ni ulemu we tangwa lieswe nganganga.

⁹ Kanda ungumbila ha mwaka wa ushinakaji. Kanda ungwehuka muze tachi jami hijahwa.

¹⁰ Mumu akwa kole jami kakungwambamba, waze akufupa mwono wami kakungutwama punga.

¹¹ Ngwo, Zambi hanamwehuka, mukaulenu numukwate mumu mukwa kumupulula wakuhi.

¹² Zambi kanda utwama kusuku ni yami. Zambi yami tambuka kama ungukwase.

¹³ Waze akulimika ni mwono wami akevwe sonyi akajimuke. Waze akufupa kungulemeka akafukiwe ni kuchoka ni kusauka.

¹⁴ Alioze yami mungutala matangwa eswe; nikuweza hindu uhaliso kuli yena weka ni weka.

¹⁵ Kanwa liami mulikambulula ululi we, ulamwino we tangwa lieswe nganganga mumu Chanyingikine kwalula chawo.

¹⁶ Mungwiza ni yitanga ya ndundo ya Mwene Yehova; munguvulwoka ululi we, ewa, wa yena wika.

¹⁷ Yena Zambi wangulongesele chize ku wanuke wami; mba kushi nambujolele yitanga ye ya kukomwesa.

¹⁸ Zambi, muze mungupwa kashinakaji ni kambu jitoma, kanda ungwehuka kama ndo hinambujola tachi je ku chisemuko chize muchizaho, ndundo je kuli waze eswe mezaho.

¹⁹ Ululi wa yena Zambi wanangama. Hiunalingi yuma yinene; Zambi, iya walifwa ni yena?

²⁰ Yena watulweza lamba linji likalu mukatuhuzulula nawa. Mukatuchiza cheka nawa kushi lia mavu.

²¹ Weza kama ku unene wami, utewuluke nawa ungulembejeke.

²² Mungukuhalisa ni kalialia, ni umwenemwene wa yena Zambi yami. Kuli yena mungwimba uhaliso ni kalialia, yena mwe Musandu wa Izalele.

²³ Mivumbo yami muyikawahilila chikolo muze mungukwimbila uhaliso, hamwe ni mbunge yami yino wayikula.

²⁴ Limi liami mulihanjika ya ululi we tangwa lieswe, mumu waze akufupa kungulemeka hevwa sonyi, halitupieka.