Miaso (Masamu) 7 - MUKANDA USANDU WA ZAMBI 1975

¹ Yehova Zambi yami, muli yena naswama; ngulamwine kama kuli waze eswe akunguhungumiona, ungupulule.

² Kuchina mapapulula mwono wami ngwe ndumba, nikuusonya tuyipinji shimbu kukushi niumwe wa kungupulula.

³ Yehova Zambi yami, nyi hinalinga chino chuma; nyi nguli ni uhenge mu moko jami;

⁴ nyi hinalinga chipi kuli yoze watwama ni sambukila kuli yami, (pundu hinapulula yoze halipwisa mukwa kole yami ni chitela chakuhi)

⁵ Nyi chocho, tayiza mwe mukwa kole ahungumione mbunge yami ayimbate, ewa umutayize kuliachila mwono wami hashi, ambile ulemu wami mu fufuta.(Litulike.)

⁶ Katuka kama Yehova ni utenu we; katuka mumu ha ufwatulo wa akwa kole jami: ulaule kama hali yami; yena hiwasela upatwilo.

⁷ Chocho chikungulwila cha atu muchikujingilika. Hali ayo uhiluke mwilu.

⁸ Yehova kumapatwila e atu. Ngupatwile kama Yehova nikulita ni ululi wami, nikulita ni kutuwika chami chize chili muli yami.

⁹ We ungulungulu wa yingulungulu ukahwe lume, alioze jikijisa mwe mukwa ululi; mumu mwe Zambi ya ululi kakweseka kunyonga cheswe cha mbunge.

¹⁰ Lukepwe wami wa kuli Zambi, yoze wakulamwina waze analulama mu mbunge.

¹¹ Zambi iye ngaji ya ululi; kakutenuka tangwa ha tangwa.

¹² Nyi kachi umwe kechi kuhiluka, kumahela katana kenyi, hanana uta wenyi, haululika.

¹³ Hanaululikila yitwa ya kufwa, hapwisa mivu yenyi ya kahia.

¹⁴ Kumanyi kanapinji ni uhenge; hanaseseka uhuka; hanaseme mahuza.

¹⁵ Hafula wumbu, halijotola; mba halimbukila mu wina iye mwene waufulile.

¹⁶ Uhuka wenyi muukamuhilukila ha mutwe wenyi mwene; upupilo wenyi muukamuholokela ha mbanda-mutwe.

¹⁷ Kumunguhalisa Yehova nikulita ni ululi wenyi; kumungwimba uhaliso ku jina lia Yehova mwe Chitunda. Kuli Njimba mukwa lutwe. Ha Ngitite. Samu lia David.