Miaso (Masamu) 69 - MUKANDA USANDU WA ZAMBI 1975

Kuli Njimba mukwa lutwe. Ha Shoshanime. Samu lia David.

¹ Zambi, ngulamwine kama, mumu meya hanjila ndo ku mbunge yami.

² Ngunatweme mu malowa asuku kuze mutu keshi kuhasa kumana. Hinaheta ku meya asuku kuze masanga a meya anangulundumukina.

³ Janguhwa ni kulila chami. Muliwu wami unomu chau. Meso jami hijahwa nikutalatala Zambi yami.

⁴ Waze ananguvwila kole yamokomoko hahiana kambu ja ha mutwe wami. Kanatakama, waze anazange kungusutula mwono; hapwa akwa kole jami shili yamokomoko. Hohene nahilwishile chize cheyile.

⁵ Zambi, yena unanyingika uhepuke wami. Milonga yami kuyaswamine kumeso je.

⁶ Waze anakutwaminyina yena Mwene Yehova-wa-Tujita, kandevwa sonyi mumu hali yami. Waze akukufupafupa, yena Zambi ya Izalele kanda asauka mumu hali yami.

⁷ Mumu hali yena hinatambula kuchoka. Sonyi hijangufuka ku meso.

⁸ Hinalumuka chilambala kuli akwetu. Hinalumuka kandaka kuli ana ja mama.

⁹ Mumu kulinga ni mbunge yeswe ha zuwo lie chinanguli; kuchoka cha waze akuchokele yena hichangupwila yami.

¹⁰ Muze nalilile, nikufumba mbunge yami nikulitwamina kulia, acho chapwile nawa cha kunguchoka.

¹¹ Muze natengele chikeleyi mazalo jami, nalumukine nguli chishima kuli ayo.

¹² Waze atwama mu chikolo cha limbo kakunguhanjikila. Hinapwa mwaso wa akwa kuzengewa.

¹³ Alioze ha kutwala kuli yami, kulemba chami chili kuli yena Yehova, ha mwaka upema. Zambi, mu kulumbama cha utu wa zango lie ungukumbulule kama ni umwenemwene wa ulamwino we.

¹⁴ Ngupulule kama ku malowa, kanda ungutayiza kushimbama. Angupulule kuli waze anguvwila kole ni ku meya asuku

¹⁵ Kanda utayiza sanga lia meya kungulundumukina. Kanda utayiza lie jinga kungumina; chipwe wina kanda upakika kanwa liawo hali yami.

¹⁶ Yehova, ungukumbulule kama mumu utu wa zango lie upema. Nikulita ni kulumbama cha keke ye tewulukila kama kuli yami.

¹⁷ Kanda usweka meso je kuli yami kambaji ke, mumu nguli mu luyinda; ngukumbulule nikawashi.

¹⁸ Kundama ku mbunge yami uyikule. Ungufwetele kama mumu hali akwa kole jami.

¹⁹ Kuunanyingika chize ananguchoko, ni sonyi jami, ni kusauka chami. Akwa kulimika ni yami anasoloka kumeso je.

²⁰ Luchoko hanamakuna mbunge yami; ngunazala tò ni kulemewa. Nafupile amwe anguvwile kama keke, alioze akuhi. Nafupile amwe akwa kungulembejeka alioze chawanyine niumwe.

²¹ Ha kulia chami nawa anguhele kasashisa; ha pwila yami anguhele vinagre ngukanwe.

²² Mesa yo yikalumuke kambwila kumeso jo. Muze matwama nikuhwima, chikalumuke muheto kuli ayo.

²³ Layisa meso jo akapupute. Mitanda yo yikachikime matangwa eswe.

²⁴ Zukwila ufwatulo we hali ayo; kusasaminya cha utenu we chikaawane.

²⁵ Chihunda cho chikapwe cha hululu; niumwe kanda atwama mu mbalaka jo.

²⁶ Mumu kakuhungumiona yoze wamulamba yena. Kakwambulula chinyengo cha waze waalemeka yena.

²⁷ Weza kama uhenge ku uhenge wo. Kanda uatayiza kunjila mu ululi we.

²⁸ Akajimuke ku mukanda wa mwono. Kanda aasoneka hamwe ni akwa ululi.

²⁹ Alioze nguli chiswale kanda mukwa chinyengo. Zambi! Ulamwino we ukangunangamise.

³⁰ Munguhalisa jina lia Zambi ni mwaso; mungumutohesa ni kusakwila chami.

³¹ Muchikawahila Yehova kuhiana ngombe, hanji musamba yoze ukwete mbinga ni sende.

³² Yimbovu hanachimono, no anawahilila. Enu eswe nwakufupafupa Zambi, mbunge jenu jikatwame ni mwono.

³³ Mumu Yehova kakwivwa yiswale; keshi kulelesa funge jenyi.

³⁴ Ni lilu ni hashi yikamuhalise, ni tulunga-lwiji ni waze eswe akwendamo.

³⁵ Mumu Zambi kumakalamwina Zaione; kumakatunga membo a mu Yunda; kumakatwamamo, kumakachihinga.

³⁶ Munyachi wa tupinji twenyi nawa kumakachiswana. Waze akuzanga jina lienyi kumakatwamamo.