Miaso (Masamu) 68 - MUKANDA USANDU WA ZAMBI 1975

Kuli Njimba mukwa lutwe. Samu lia David. Mwaso.

¹ Zambi akatuke, akwa kole jenyi amwangane. Waze eswe amuvwila kole achine kumeso jenyi.

² Ngwe mwishi muuhungumuka, chocho ukaahume. Ngwe seta yakusangunuka chocho nawa yingulungulu akakuwe kumeso ja Zambi.

³ Alioze akwa ululi akawahilile, akalikwize kumeso ja Zambi. Ewa akawahilile ni chiseke.

⁴ Embilenu Zambi. Imbenu uhaliso ku jina lienyi. Lulikenu tapalo lia yoze wakupalika ndusu mu puya. Jina lienyi Yehova; likwizenu kumeso jenyi.

⁵ Zambi mu zuwo lienyi lisandu kapwa tato ya ana-ashiwa, kanda sopi ya twamishi a mapwo.

⁶ Waze atwama ukawo Zambi kakwatwamisa mu majiko ni akwo. Kakuneha funge ku upite wa kulumbama, alioze akwa kukolema kakutwama mu chifuchi chumu chau.

⁷ Yena Zambi, muze watuhukile kulutwe lia atu je, muze wendele ndusu mu puya.(Litulike.)

⁸ Hashi hanyikine, vula nawa anokene kwilu kumeso ja Zambi. Chipwe Sinai yachikimine kumeso ja Zambi, mwe Zambi ya Izalele.

⁹ Yena Zambi watumine vula wa kulumbama. Chihinga che waatakamishine muze evwile yikatalo.

¹⁰ Chikungulwila che chatwaminemo. Yena Zambi, ni utu we walulikile yuma ya kukwasa yiswale.

¹¹ Mwanangana kakuhana liji, alioze mapwo aze mambulula sango, chihuji chinene.

¹² Mianangana a tujita machina; machina. Alioze mapwo aze asalile ku mazuwo malipangila upite.

¹³ Chipwe nwapombele hakachi ka malimba a mapanga munupwa ngwe mapulwa ja katele a kulamika ni prata ngona jenyi ja kulamika ni oru ya chizumwa.

¹⁴ Muze Mukwa-Ndundo-Jeswe wamwangineho mianangana, kwapwile ngwe neve ha Salamone.

¹⁵ Mulundu wa Mbashane wapwa mulundu wa Zambi. Mulundu wa Mbashane wapwa mulundu usuku.

¹⁶ Enu milundu yisuku, kuchi te munutala ni ukwa ku mulundu uno Zambi hauzanga ukapwe zuwo lienyi? Ewa, Yehova kumakatwamamo ku miaka ya mutolo.

¹⁷ Matemba a Zambi a jita apwa makumi aali a tununu, chipwe tununu twa tununu. Mwe Mwene kwali hakachi ko ngwe ku Sinai muma mwenyi musandu.

¹⁸ Ena hiwazezuka mwilu hiwatwala funge ku ufunge, hiwatambula yawana hakachi ka atu, ewa, chipwe hakachi ka akwa kukolema nawa hanga Yehova Zambi akatwame hakachi ko.

¹⁹ Mwene afumane, yoze wakumbatambata chiteli chetu tangwa ha tangwa. Iye mwe Zambi yoze wapwa ulamwino wetu.(Litulike.)

²⁰ Zambi hapwa kuli yetu Zambi ya kupulula. Kutuhuka mu kufwa chapwa cha kuli Yehova mwe Mwene.

²¹ Alioze Zambi mapula ndusu mitwe ya akwa kole jenyi, ni chikowa cha kambu cha yoze menda mu milonga yenyi.

²² Mwene wambile ngwenyi, Mungwachiza nawa ku Mbashane, mungwachiza nawa ha mashima a kalunga-lwiji,

²³ Hanga ukachupike chiliato che mu manyinga, hanga malimi a tuwa twe akapwe ni chihanda cho cha kuli akwa kole je.

²⁴ Hanamono kwenda che, Zambi, chipwe kwenda cha Zambi yami kanda mwanangana wami, muma musandu.

²⁵ Akwa kwimba atetekelele; akwa yisaji akawile kunyima, hakachi ka ana-mapwo akwimba tungoma.

²⁶ Fumanyisenu Zambi, iye mwe Mwene, mu chikungulwila, enu nuli a ku fuji lia Izalele.

²⁷ Kuze kwatwama kanuke Mbenjamine, mukwa kwayula, ni yilolo ja Yunda, ni akwa punga jo, ni yilolo ja Zapulone, ni yilolo ja Napatali.

²⁸ Zambi ye hatuma tachi je. Yena Zambi kolesa chize hiwatulingila.

²⁹ Mianangana kumakunehena milambu mumu ha tembele ye ku Yerusaleme.

³⁰ Ambila ngongo ja ku mbungu, ni chendo cha kuji a ngombe hamwe ni ana a ngombe a atu, waze anazeye ni mbongo ja prata. Iye hamwanga atu aze awahililile ni jita.

³¹ Yilolo makatuka ku Engitu; Etiopia malipupwisa kuzoza moko jenyi kuli Zambi.

³² Embilenu Zambi, enu akwa mawanangana a hano hashi. Imbenu uhaliso kuli Mwene.(Litulike.)

³³ Kuli yoze unende helu lia malilu a malilu aze atwama chize ku shakulu, ivwenu, kanahanjika liji lienyi, lie liji lia ndundo.

³⁴ Fumanyisenu tachi ja Zambi. Upeme wenyi uli helu lia Izalele. Tachi jenyi jili mu malelwa.

³⁵ Zambi, uli kole ni woma kuma kwe kusandu. Mwe Zambi ya Izalele kakuhana tachi ni ngolo kuli atu jenyi. Zambi afumane!