Miaso (Masamu) 66 - MUKANDA USANDU WA ZAMBI 1975

Kuli Njimba mukwa lutwe. Mwaso. Samu.

¹ Kwizenu Zambi yenu akwa hashi eswe.

² Imbenu ulemu wa jina lienyi; uhaliso wenyi nukaupwise wa uhenya.

³ Ambenu kuli Yehova ngwenu, Yitanga ye kuyakukolesa woma! Akwa kole je kumakakuzeyela mumu ha unene wa ndundo je.

⁴ Akwa hashi eswe kumakakuwayila, nikukwimbila yena, nikwimbila jina lie.(Litulike.)

⁵ Tweyenu numone yitanga ya Zambi; kakukolesa woma ni yilinga yenyi kuli ana ja atu.

⁶ Walumwine kalunga-lwiji mavu omu; apalikile ndusu mu lwiji ha molu jo, henaho twawahililile muli iye.

⁷ Iye kayula ni ngolo jenyi ndo ku miaka ya mutolo. Meso jenyi kakutala akwa mavungu; akwa kukolema kanda alinangamisa.(Litulike.)

⁸ Enu atu, fumanyisenu Zambi hanga liji lia kumuhalisa likahiohie.

⁹ Yoze wakutwamisa mbunge jetu ni mwono; keshi kutayiza yiliato yetu kukokoloka.

¹⁰ Mumu yena Zambi, hiwatweseka; hiwatutomesa ngwe akweseka prata.

¹¹ Watukoka mu wanda; watutwikile chiteli chilemu ha miongo yetu.

¹² Watayijile atu kuliata ha mitwe yetu. Twapalikile mu kahia ni mu meya, alioze watunehene homa ha upite.

¹³ Mungunjila mu zuwo lie ni milambu ya kulumba. Mungukufweta yilakenyo yami,

¹⁴ yize mivumbo yami yavulukile, kanwa liami liambile muze napwile mu huli.

¹⁵ Mungukutambula milambu ya kulumba ya misamba a maji, hamwe ni insensu ya kuji a mapanga. Mungutambula ana a ngombe hamwe ni pembe.(Litulike.)

¹⁶ Tweyenu nwivwe, enu eswe nwavwila woma Zambi, mba mungulumbununa yize halinga ha mbunge yami.

¹⁷ Natetele kuli iye ni kanwa liami, namuchichimiekene ni limi liami.

¹⁸ Nyi mungunyonga uhenge mu mbunge yami, Mwene kechi kungwivwa.

¹⁹ Alioze chamwenemwene Zambi hanevu; hanapanjika ku liji lia kulemba chami.

²⁰ Zambi afumane, yoze kombileko nyima ku kulemba chami; kanguminyine utu wa zango lienyi.