Miaso (Masamu) 65 - MUKANDA USANDU WA ZAMBI 1975

Kuli Njimba mukwa lutwe. Samu lia David. Mwaso.

¹ Ena Zambi uhaliso unakutwaminyina mu Zaione; kuli yena makamanununa chilakenyo.

² Yena wakwivwa kulemba; kuli yena akwa musunya eswe meza.

³ Yuma ya uhenge yangukumba. Ha kutwala ku milonga yetu, yena mukayitomesa.

⁴ Kawaha yoze wamutongola yena nikumukundamisa kuli yena, akatwame mu yize ye. Mutuyuka ni upeme wa zuwo lie; muma musandu mu tembele ye.

⁵ Yena Zambi ya ulamwino wetu, ni ululi mukatukumbulula ni yuma ya mwongo. Kuli yena atu eswe ndo ku masongo a hashi kakujikijila, ni waze atwama kusuku ha kalunga-lwiji.

⁶ Yoze wakukolesa milundu ni tachi jenyi, nikulijichikila ni ndundo.

⁷ Yoze wakuholesa Chizungozungo cha tulunga-lwiji; chizungozungo cha mikanya yo ni kuzunguluka cha atu.

⁸ Waze atwama kusuku kakuvwila woma yilayi ye. Yena wakuwahisa kutuhuka cha chimene ni chingoloshi.

⁹ Wakunangisa hashi nikuhinjilaho meya; wakuwahisaho chikolo. Lwiji wa Zambi kazala ni meya; wakwaaha tiliku muze hiwalulika hashi chocho.

¹⁰ Wakuhinjila meya a kulumbama ha mihanga yaho, nikusalamisa mavu jaho. Wakwovulisaho ni vula, nikuwahisa kusoka chaho.

¹¹ Wakuwahisa mwaka ni utu ngwe chipangula. Majila je eswe akusotokela ni maji.

¹² Akusotokela ha kelo ja mu puya; milundu yeswe yalijika ni uwahililo.

¹³ Kelo jazala ni yendo ya yimuna; yikulo yazala ni tiliku; yakulikwiza ni uwahililo nikwimba nawa.