Miaso (Masamu) 64 - MUKANDA USANDU WA ZAMBI 1975

Kuli Njimba mukwa lutwe. Samu lia David.

¹ Zambi, ivwa kama liji liami ha kunenganyana chami; ufunge mwono wami ku woma wa mukwa kole.

² Ngusweke kama ku kanjiliji ka akwa yitanga yipi, ni ku Chizungozungo cha akwa kulinga uhenge.

³ Hahela limi lio ngwe katana; hatondekeza mivu yo, e maliji asasu.

⁴ Hanga akaswame nikwasa mutu mungunu. Susumuku mamukonga, ni woma wakuhi.

⁵ Kakulisongojola mu kutaha chipi. Kakulishimwinya akatele makambwila ku lumbu. Kanambe ngwo, Iya mayimona?

⁶ Kakufupafupa yuma ya uhenge, mba mamba ngwo, Hitwahengula kanawa. Nyonga lio lia muchima lia mbunge liasuha chikolo.

⁷ Alioze, Zambi kumakaasa, makaalemeka ni mwivu susumuku.

⁸ Chocho maalimbwisa, se limi lio ene lialimika no. Mweswe maamona mahunga mutwe wenyi.

⁹ Atu eswe mevwa woma; makambulula chitanga cha Zambi; makanyonga ni mana yuma yize alinga.

¹⁰ Akwa ululi makawahilila muli Yehova; makaswama muli iye; akwa kululama mu mbunge makalisamba.