Miaso (Masamu) 63 - MUKANDA USANDU WA ZAMBI 1975

Samu lia David muze apwile mu puya ya Yunda.

¹ Zambi, yena uli Zambi yami, chimenemene mungukufupa. Mbunge yami kuyakukuvwila pwila; musunya wami kuwakukuvwila usona, mu chifuchi chumu cha yikatalo muze kumushi meya.

² Chocho nakutalile muma musandu ngukamone ndundo je ni ulemu we.

³ Utu wa zango lie wahiana mwono. Mivumbo yami muyikuhalisa.

⁴ Chocho mungukufumanyisa shimbu lieswe nguli ni mwono. Munguzundula moko jami mu jina lie.

⁵ Mbunge yami muyikayuka ni usongosongo ni maji. Kanwa liami mulikuhalisa ni mivumbo ya uwahililo,

⁶ muze mungukwiwuluka ha muhela wami nikupukuna yuma ya yena hakachi ka ufuku.

⁷ Mumu yena kuwapwa chikwashi chami, mu Chizulie cha mapulwa je munguwahilila.

⁸ Mbunge yami kuyakulihanga ni yena. Kwoko lie lia chindume kuliakungujikijisa.

⁹ Alioze waze akufupa mbunge yami akayonwone kumakanjila mushi lia hashi.

¹⁰ Kumakaakunjika ku tachi ja katana. Kumakapwa ya kulia ya mikuza.

¹¹ Mumu mwanangana kumakawahilila muli Zambi; mweswe malishinga nenyi malisamba. Mumu kanwa lia waze akuhanjika mahuza kumakalipakika.