Miaso (Masamu) 62 - MUKANDA USANDU WA ZAMBI 1975

Kuli Njimba mukwa lutwe, ha Yedutune. Samu lia David.

¹ Mbunge yami yinahwimi kanawa muli Zambi wika. Kuli iye kunakatuka ulamwino wami.

² Iye wika kapwa liwe liami kanda ulamwino wami. Iye kaposhi kami musuku, kashika chichi kukokoloka chikolo.

³ Ndo mwiji muka munulundumukina mutu nukamushihe, yenu eswe hamuwika, ngwe yishimi ya zuwo lize linatenguka, ngwe chipanga chize chinazeuka.

⁴ Kakutwama punga chuma chimuwika akamunungune ku upeme wenyi. Kakuwahilila ni mahuza. Kakuwahisa ni makanwa, alioze muchima kakutuka.(Litulike.)

⁵ Mbunge yami hwima muli Zambi wika, mumu kutalatala chami chili kuli iye wika.

⁶ Iye wika kapwa liwe liami kanda ulamwino wami. Iye kaposhi kami musuku, chichi kukokoloka.

⁷ Kuli Zambi kwatwama ulamwino wami ni ulemu wami. Liwe lia tachi jami kanda uchinyino wami uli muli Zambi.

⁸ Enu atu, fulielenu iye miaka yeswe. Zukwilenu mbunge jenu kumeso jenyi. Zambi iye uchinyino wetu.(Litulike.)

⁹ Chamwenemwene atu aze keshi ulemu apwa amokomoko; atu alemu o apwa mahuza. Kwasa mu pezu mazunduka; eswe hamuwika anahuhuka; ni mwiku shinaho.

¹⁰ Kanda ufuliela mbenga. Kanda ulilengela ni ungumba. Chipwe upite muoka kanda ukausa mbunge ye.

¹¹ Zambi hanahanjika kamuwika. Kaali hinevwa chuma chino, ngwo, Ndundo japwa ja mbala ja Zambi.

¹² Chikwo nawa, utu wa zango wapwa wa mbala wa yena mwe Mwene, mumu wakuhana kuli mutu mweswe nikulita ni milimo yenyi.