Miaso (Masamu) 60 - MUKANDA USANDU WA ZAMBI 1975

Kuli Njimba mukwa lutwe. Ha Shushane-Edute. Mikatame ya David ha kulongesa. Muze alitachikile ni Arame-naharaime ni Arame-zopate, muze Joabe ahilukile akalambe A-Endome mu Chikulo cha Mungwa kumi lia tununu ni tununu aali.

¹ Zambi hiwatumbila, hiwatupuzula, hiwatenuka, mba utuhuzulule nawa.

² Hiwachikimisa chifuchi, hiwachipula. Tunga cheka nawa yituwa yacho, mumu chinachikima.

³ Hiwalweza atu je yuma yikalu, hiwatunwisa vinyu ya kutuzenga.

⁴ Hiwahana mbandeira kuli waze akukuvwila woma, hanga akayisolole mumu ha umwenemwene.(Litulike.)

⁵ Utukumbulule, utulamwine ni kwoko lie lia chindume, hanga yoze unamuzange akapuluke.

⁶ Zambi hanahanjika ni usandu wenyi, kashika mungulikwiza. Mungupula Shekeme. Munguzonga chikulo cha Sukote.

⁷ Ngiliate niyami, ni Manase niwami, Eframe nawa mukwa kufunga mutwe wami. Yunda niwami, mukwa kuhana yiyulo.

⁸ Moape mbasia yami ya kusanyina. Kuli Endome mungumbila luhaku wami. Helu lia Filistea mungukalumioka ha kukumba.

⁹ Iya manguneha ku chihunda cha ngolo? Iya mangutwala ku Endome?

¹⁰ Yena Zambi kwatumbilile? Zambi kushi kutuhuka ni tujita twetu?

¹¹ Utukwase kama kulimika ni akwa kole jetu mumu kukwasa cha atu chamokomoko.

¹² Ku tachi ja Zambi kumutulinga ni utunu, mumu iye maliata akwa kulimika ni yetu.