Miaso (Masamu) 6 - MUKANDA USANDU WA ZAMBI 1975

¹ Yehova, kanda ungwambila mu utenu we; kanda ungulamba mu ufwatulo we.

² Nguvwile kama vumbi Yehova, mumu nguli mulelu. Yehova nguwuke kama mumu yifwaha yami yinachikima.

³ Mbunge yami kuyakuchikima chikolo, alioze yena Yehova ndo mwiji muka?

⁴ Hiluka Yehova; pulula mbunge yami; ngulamwine kama mumu ha utu wa zango lie.

⁵ Mumu mu kufwa keshi kukwiwuluka. Mu Shiole iya makusakwila?

⁶ Yikatalo ngunevu ya mikuma yami. Ufuku weswe nakuulisa muhela wami ni masoji. Nakuhinjila muu wami ni masoji jami.

⁷ Meso jami hanahu ni chinyengo; hanakukwoka ha mukunda wa akwa kole jami.

⁸ Katukenu kuli yami yenu eswe akwa kulinga uhenge; mumu Yehova hanevu liji lia kulila chami.

⁹ Yehova hanevu kuliumba chami; Yehova kumatambula kulemba chami.

¹⁰ Akwa kole jami eswe kumevwa sonyi; kumachikima chikolo; kumachinduluka akevwe sonyi nikawashi. Shigayone ya David, yize embile kuli Yehova ha kutwala ku maliji a Kushe Ka-Mbenjamine.