Miaso (Masamu) 59 - MUKANDA USANDU WA ZAMBI 1975

Kuli Njimba mukwa lutwe. Ha Ala-tashete. Samu lia David. Mikatame, muze Saulu atumine akaseleke zuwo, amushihe.

¹ Zambi yami, ngupulule kama kuli akwa kole jami. Ngusweke mwilu kuli waze akungukatukila.

² Ngupulule kama kuli akwa kulinga uhenge. Ngulamwine kama kuli akwa kumwanga manyinga.

³ Mumu kakujikinyina mwono wami. Akwa ndundo kakungukungulukila. Kuchapwile ha mulonga wami, hanji ha shili yami, Yehova.

⁴ Kakuzomboka nikulilulika, chitela chakuhi. Laula kama ungukwase, Uchitale kama.

⁵ Chipwe yena Yehova Zambi-wa-Tujita, Zambi ya Izalele, katuka uliwane ni akwa mavungu eswe. Kanda uvwila vumbi waze yivulumunyi akwa Utanguko.(Litulike.)

⁶ Kakuhiluka ha chingoloshi; kakupwozonoka ngwe kawa, nikujinga ku chihunda.

⁷ Kakutaula ni makanwa jo; tutana atwama mu mivumbo yo, mumu kakwamba ngwo, Iya machivwa?

⁸ Alioze yena Yehova kumukaaseha. Kumukakekuna akwa mavungu eswe.

⁹ Yena tachi jami, mungukutwaminyina; mumu Zambi iye kaposhi kami.

¹⁰ Zambi yami ya utu wa zango kumangupatwiza. Zambi malinga chize ngunazange kuli akwa kole jami.

¹¹ Kanda uashiha kuchina atu jami mavulama. Ukaamwange ni tachi je ukaalimbule, Mwene lukepwe wetu.

¹² Mumu ha shili ya mu makanwa jo, ni maliji a ha mivumbo yo akakwachike mu kulengumuka cho, mumu te ha matuka ni mahuza aze akuhanjika.

¹³ Ukaonwone ni ufwatulo; onwona akajimuke, akanyingike ngwo, Zambi kakuyula mu Yakomba, ndusu ni ku masongo ja hashi.(Litulike.)

¹⁴ Ha chingoloshi nawa akahiluke akapwozonoke ngwe kawa shimbu majinga ku chihunda.

¹⁵ Akalihize ku tunda ni ku mwanda ha kulia, akashimbule ufuku weswe nyi kakuchile.

¹⁶ Alioze yami mungwimbila tachi je, ewa, ni liji linene mungwimbila utu wa zango lie chichamene. Mumu wapwa kaposhi kami, kanda ngwe chiswamo ha tangwa lia luyinda wami.

¹⁷ Kuli yena, tachi jami, mungwinba uhaliso, mumu Zambi iye kaposhi kami, Zambi ya keke yami.