Miaso (Masamu) 58 - MUKANDA USANDU WA ZAMBI 1975

Kuli Njimba mukwa lutwe. Ku Ala-tashete. Samu lia David. Mikatame.

¹ Ha kuhola kulungunga nunahanjika ululi, nyi? Enu ana ja atu, nwakupatula ni umwenemwene, nyi?

² Alioze mu mbunge nwakulinga ungulungulu, kunwakuzonga upupilo wa moko jenu hano hashi.

³ Yingulungulu kahungula Zambi chize ku jimo. Machiasema o mahungumuka nikuhanjika mahuza.

⁴ Utende wo wapwa ngwe utende wa kapela. Kalifwa ni fwiji yoze kafwa-matwi, hajika matwi jenyi.

⁵ Keshi kupanjika liji lia mukwa kulembejeka, chipwe mamulembejeka ni mana anji.

⁶ Zambi, pukula kama mazo jo mu kanwa. Yehova pukula mbwazo ja mievu ja ndumba.

⁷ Ahuwe ngwe meya aze anahichi. Muze matondekeza mivu yenyi yikapwe ngwe ya kupatula.

⁸ Akapwe ngwe kole yoze masangunuka, jimu lume! Akapwe ngwe mwana wa kuselumuna kuli naye, kanda achimona mwalwa.

⁹ Ngwe mingonga shimbu ndeho kanda yichivwa chivukuminya chayo mayihehula ni chijimbi, ni ya wisu ni ya kahia hamuwika.

¹⁰ Mukwa ululi mawahilila muze mamona che kukala. Masanyisa yiliato yenyi mu manyinga a yingulungulu.

¹¹ Chocho atu mamba ngwo, Chamwenemwene kwononona cha mukwa ululi kuchili; chamwenemwene kwali Zambi mukwa kupatula hano hashi.