Miaso (Masamu) 57 - MUKANDA USANDU WA ZAMBI 1975

Samu lia David. Mikatame. Muze achinyine kuli Saulu mu chivwenge.

¹ Nguvwile kama vumbi, Zambi, nguvwile kama vumbi, mumu mbunge yami kuyaswama muli yena. Ewa, mu Chizulie cha mapulwa je munguswama ndo luyinda yono hahwa.

² Munguteta kuli Zambi mwe Chitunda; kuli Zambi yoze wakungulingila yuma yeswe.

³ Iye kwilu kumatuma akangulamwine, muze mukwa kungwonwona manguchoka; (Litulike.) Zambi matuma utu wa zango lienyi ni umwenemwene wenyi.

⁴ Mwono wami watwama hakachi ka ndumba. Ngunapombo hakachi ka waze akuhwilijela kahia; chipwe ana ja atu aze akwete mazo ngwe makunga ni mivu; limi lio liapwa ngwe katana wa kuhela.

⁵ Yena Zambi ukanangame helu lia malilu. Ulemu we ukapwe helu lia hashi heswe.

⁶ Molu jami haateta wanda. Mbunge yami yinafumbama. Hangufulila wumbu kulutwe alioze ene hanaholokelamo. (Litulike.)

⁷ Mbunge yami, yinakolo, Zambi, mbunge yami yinakolo. Kumungwinba, ewa, kumungwimba uhaliso.

⁸ Laula ulemu wami! Laulenu kalialia ni chisaji cha kusa. Yami mwene mungulaula chimenemene mbwi.

⁹ Mungusakwila kuli yena mwe Mwene hakachi ka atu. Mungukwimbila uhaliso hakachi ka mavungu.

¹⁰ Mumu utu wa zango lie watoha ndo ku malilu; umwenemwene we watoha ndo ku malelwa.

¹¹ Yena Zambi ukanangame helu lia malilu. Ulemu we ukafwe helu lia hashi heswe.