Miaso (Masamu) 55 - MUKANDA USANDU WA ZAMBI 1975

Kuli Njimba mukwa lutwe ha tulialia a kusa. Masakile ya David.

¹ Zambi, panjika kama ku kulemba chami. Kanda uswama ku kuliumba chami.

² Ungwivwe kama, ungukumbulule. Ngunapinji ni chikuma chami nikutwa mikuma.

³ Mumu ha liji lia mukwa kole. Mumu ha kupinjisa cha yingulungidu. Mumu kakumbilambila uhenge hali yami. Kakunguhungumiona ni utenu.

⁴ Mbunge yinangukolo muchima; mwongo wa kufwa hiwangushata.

⁵ Woma ni kuchikima hiyanguholokela. Mwongo hiwanguzemukina.

⁶ Kashika nambile ngwami, Nyi kachi nguli ni mapulwa a katele te! Kachi munguhumuka kusuku ngukahwime.

⁷ Kachi mungwendangana kusuku ngukatwame mu puya.(Litulike.)

⁸ Kachi munguya fuji ku chiswamo ngu-kaswame ku kangonga ni kakundukundu.

⁹ Mwene, wonwone kama. Pula limi lio, mumu hinamona upupilo ni kulitachika mu limbo.

¹⁰ Mwalwa ni ufuku kakulijinga ha yipanga yalio. Uhenge nawa ni uhuka unatwama muchima lialio.

¹¹ Ungulungulu uli muchima lialio. Kupinjisa ni kwonga kuyishi kuhona mu matapalo jamo.

¹² Mumu nyi mukwa kole hanguchoka te, kachi nalikoleza. Alioze hi mukwa kole ko yoze walizata ni yami, kachi naswama kuli iye.

¹³ Alioze yena mwene, mutu mulietu, sepa liami kanda kasendo kami.

¹⁴ Twalishimwinyine chipema hamuwika. Twaliendelele mu zuwo lia Zambi hamwe ni mbunga.

¹⁵ Kufwa chikaalundumukina, susumuku akapalumuke a mwono mu Shiole, mumu ungulungulu watwama mu mazuwo jo hakachi ko.

¹⁶ Alioze ha kutwala kuli yami, mungutambika kuli Zambi. Yehova mangulamwina.

¹⁷ Ha chingoloshi, ni ha chimene, ni ha mwalwa mungulinyenga ni mikuma, mba iye mevwa liji liami.

¹⁸ Hanakula mwono wami ni sambukila ku jita yize yalimikine ni yami, mumu waze alitachikile ni yami te anji.

¹⁹ Zambi kumakevwa, kumakaakumbulula yoze watwama ku miaka ya shakulu.(Litulike.) Mumu kasolo kwalumuka, kevwilileko woma Zambi.

²⁰ Hazoza moko jenyi kulimika ni waze atwamine nenyi ni sambukila. Hajilula usendo wenyi.

²¹ Kanwa lienyi liasenenene ngwe maji a yamwa, alioze mbunge yenyi yapwile jita. Maliji jenyi ovulile kuhiana maji hindu apwile poko ja kutomona.

²² Mbila chiteli che hali Yehova, iye makakukolesa. Kechi kutayiza akwa ululi kukokoloka nilimwe tangwa.

²³ Alioze yena Zambi kumukaalundumwina mu jondo ya kwonwona. Malunga a kumwanga manyinga ni kwonga kechi kuheta hakachi ka matangwa jo. Hindu yami mungukufuliela.