Miaso (Masamu) 54 - MUKANDA USANDU WA ZAMBI 1975

Kuli Njimba mukwa lutwe ha tulialia a kusa. Masakile ya David, muze A-Zife ejile nikwamba kuli Saulu ngwo, Te David kaswamine hakachi ketu nyi?

¹ Zambi, ngulamwine kama ni jina lie. Ngupatwile kama ni ngolo je.

² Zambi, ivwa kama kulemba chami; panjika ku maliji a mu kanwa liami.

³ Mumu yilambala hanangukatukila; akwa upupilo kakufupa mwono wami. Kasele Zambi kumeso jo.(Litulike.)

⁴ Talenu, Zambi iye chikwashi chami; Mwene kwali hakachi ka waze akujikijisa mbunge yami.

⁵ Kuli akwa kole jami makaahilwisa chipi. Ukaonwone kama mu umwenemwene we.

⁶ Mungukutambula chitapo cha wana. Mungusakwilila jina lie, Yehova, mumu chinapeme.

⁷ Mumu iye hanangupulula ku lamba lieswe. Meso jami hanamono chize nazangile hali akwa kole jami.