Miaso (Masamu) 53 - MUKANDA USANDU WA ZAMBI 1975

Kuli Njimba mukwa lutwe, ha Mahalate. Masakile ya David.

¹ Chihepuke hanambe mu mbunge yenyi ngwenyi, Wakuhi Zambi niumwe. Kapiha; hanalingi uhenge wa kuzelwokesa. Niumwe walinga yipema wakuhi.

² Zambi mwilu watalile hashi hali ana a atu, akamone nyi kwali amwe ananyingika; waze akufupa Zambi.

³ Eswe lukombo hanahiluka kunyima; eswe hamuwika hanapiha. Kukushi niumwe walinga yipema, chipwe umuwika, ka.

⁴ Akwa kulinga uhenge keshi mana nyi? Waze akulia atu jami ngwe akulia mbolo, nikutambika kuli Zambi ka.

⁵ Apwile ni woma wunji, kuze te kukushi woma, mumu Zambi hanamwange yifwaha ya waze akuselekele. Hiunaakolesa sonyi mumu Zambi hanalitunuo.

⁶ Nyi kachi ulamwino wa Izalele hiwatuhuka kama mu Zaione! Muze Zambi mahilwisa ufunge wa atu jenyi, henaho Yakomba mawahilila; Izalele mevwa chiseke.