Miaso (Masamu) 52 - MUKANDA USANDU WA ZAMBI 1975

Kuli Njimba mukwa lutwe. Masakile ya David; muze Doege Ka-Endome ejile ambulwilile Saulu ngwenyi, David heza ku zuwo lia Ahimeleke.

¹ Kuchi te wakulisamba ni yipi, ena mukwa ndundo? Utu wa zango lia Zambi kuwalinduluka matangwa eswe.

² Limi lie liakutaka yuma ya uhuka ngwe tewula ya kuhela nikulingalinga ya kwonga.

³ Yena kuwazanga yipi hi yipema ko. Kuwazanga mahuza, kwazangile kuhanjika ululi.(Litulike.)

⁴ Yena, limi lia kwonga, kuwazanga maliji a kulalisa.

⁵ Alioze Zambi makakwonwona ndo ku miaka ya mutolo. Kumakakupindumuna, kumakakumbuluniuna ku mbalaka ye. Kumakakutukula ku chifuchi cha akwa mwono.(Litulike.)

⁶ Akwa ululi kumakachimona, ni womamo; mba kumakamuseha ngwo,

⁷ talenu au mutu kapwishile Zambi chiswamo chenyi, alioze wafulielele kulumbama cha upite wenyi, walitakamishine mu kuzo yenyi.

⁸ Alioze yami nguli ngwe mutondo waolevwe wisu mu zuwo lia Zambi. Kunafuliela utu wa zango lia Zambi ndo ku miaka yeswe ya mutolo.

⁹ Mungukuhalisa matangwa eswe mumu yena wachilinga. Mungutalatala ku jina lie kumeso ja asandu je mumu kuliapema.