Miaso (Masamu) 51 - MUKANDA USANDU WA ZAMBI 1975

Kuli Njimba mukwa lutwe. Samu lia David muze profeta Natane ejile kuli iye mumu te hanjila kuli Bate-Shipa.

¹ Zambi, nguvwile kama keke, nikulita ni utu wa zango lie. Jimuna kama milonga yami nikulita ni kulumbama cha vumbi lie.

² Ngusanyise kama liakulu ku uhenge wami; ngupemese ku shili yami.

³ Mumu ngunatayiza milonga yami; shili yami yili kumeso jami matangwa eswe.

⁴ Yena, yena wika, nakuvulumwine, nikulinga chuma chino chipi kumeso je. Hanga ukasambe muze muhanjika; ukatome muze mupatula.

⁵ Pundu angusemene mu uhenge. Mama wangusesekele mu shili.

⁶ Pundu yena wakuzanga umwenemwene mu michima. Mukangulongesa mana muze mwahengama.

⁷ Ngupemese ni hisope mba mungupema. Ngusanyise mba mungutoma kuhiana neve.

⁸ Nguvwise kama chiseke ni uwahililo, hanga yifwaha yize wamakwine yikawahe.

⁹ Ufuke meso je ku milonga yami, ujimune uhenge wami weswe.

¹⁰ Zambi, tenga muli yami mbunge yipema. Lulika Spiritu ya kululama muli yami.

¹¹ Kanda ungumbila kumeso je; kanda uchiza Spiritu ye Musandu kuli yami.

¹² Ungwehe cheka nawa uwahililo wa ulamwino we, ungukolese ni Spiritu ya vumbi.

¹³ Mba mungulongesa yivulumunyi majila je; akwa shili kumakalumukina kuli yena.

¹⁴ Zambi, Zambi ya ulamwino wami, ungupulule ku mutonga wa manyinga, mba limi liami mulikembila ululi we ni liji linene.

¹⁵ Mwene, pakula kama mivumbo yami, mba kanwa liami mulikambulula uhaliso we.

¹⁶ Mumu kwawahililile ni yitapo, kachi yami nakwahayo. Kwevwile chiseke cha milambu ya kulumba.

¹⁷ Yitapo ya Zambi, spiritu yize yinamakuka. Yena Zambi kushi kulelesa mbunge yize ya kulimakuna nikulikehesa.

¹⁸ Linga kanawa kuli Zaione nikulita ni upale we upema. Tunga yipanga ya Yerusaleme.

¹⁹ Henaho muwahilila ni yitapo ya ululi, ni milambu ya kulumba, ni milambu ya muwundu ya kulumba: henaho makalambula ngombe ha chilumbilo che.