Miaso (Masamu) 5 - MUKANDA USANDU WA ZAMBI 1975

Kuli Njimba mukwa lutwe. Ha Nehilote. Samu lia David.

¹ Ivwa kama maliji jami Yehova; nyonga kama ha kupukuna chami.

² Panjika ku liji lia muteto wami, yena uli mwanangana wami kanda Zambi yami, mumu kuli yena mungulemba.

³ Yena Yehova, ha chimene muwivwa liji liami; ha chimene mungululika kulemba chami kuli yena, mba mungulá.

⁴ Mumu kuwapwile umwe Zambi wakuwahilila mu ungulungulu. Yipi kuyichi kutwama ni yena.

⁵ Akwa kulizata kechi kumana kumeso je; wakuvwila kole waze akulinga uhenge.

⁶ Kumuwonwona waze akuhanjika mahuza. Yehova kakuvwila lwaji mukwa kumwanga manyinga, ni mukwa kwonga.

⁷ Alioze yami, mu kulumbama cha utu wa zango lie mungunjila mu zuwo lie, mba ni woma wa yena munguwayila nikutalikisa ku tembele ye yisandu.

⁸ Ungusongwele, Yehova, mu ululi we, mumu hali akwa kole jami; lulamisa jila ye kumeso jami.

⁹ Mumu umwenemwene wakuhi mu makanwa jo; muchima lio munapu kupiya wika; miliwu yo yinapu ngwe mafuka awashi; kakupepieka ni malimi jo.

¹⁰ Zambi uhise wano; akalimbuke mu chiyulo cho ene; uahume mu kulumbama cha Utanguko wo, mumu hanakukatukila.

¹¹ Waze eswe akuswama muli yena akawahilile, ku miaka yeswe akalikwize, mumu yena wakwafunga. Waze eswe akuzanga Jina lie awahilile muli yena.

¹² Mumu yena Yehova kumuwahisa mukwa ululi; kumumujingilika ni vumbi ngwe lukepwe. Kuli Njimba mukwa lutwe: ha tulialia a kusa nikulita ni Sheminite. Samu lia David.