Miaso (Masamu) 49 - MUKANDA USANDU WA ZAMBI 1975

Kuli Njimba mukwa lutwe. Samu lia ana a Kora.

¹ Ivwenu chuma chino, enu mavungu eswe. Panjikenu, enu eswe nwatwama hano hashi.

² Ni alelu ni alemu, ni pichi ni yiswale hamwe.

³ Kanwa liami mulikahanjika mana. Kupukuna cha mbunge yami muchikapwa cha chinyingi.

⁴ Munguhetamisa twitwi liami ku chishima; mungulumbununa chijimbikilo chami ha kalialia.

⁵ Kuchi te mungwivwa woma ha matangwa a yuma yipi muze uhenge wakungujingilika kwe ku tushijino twami.

⁶ Waze akufuliela upite wo, nikulenga mu kulumbama cha yikumba yo,

⁷ niumwe hakachi ko mahasa kukula mwanakwo, nichimwe, chipwe kuhana kuli Zambi upite wa kumukula nawo.

⁸ Mumu ukule wa mwono wo ukalu, mba wakuhwa ndo ku miaka ya mutolo.

⁹ Akatwame ni mwono matangwa eswe, hanga kechi kamona kupola.

¹⁰ Mumu kakumona ngwe akwa mana kakufwa; ni chihepuke ni yoze keshi mana kakunonga hamuwika nikuhichika upite wo kuli akwo.

¹¹ Kakuzanga mu mbunge jo hanga mazuwo jo ukalinduluke ku miaka ya mutolo, ni yihunda yo yikalinduluke ku yisemuko yeswe. Mavu jo kakwalukaluka majina jo.

¹² Alioze mutu keshi kulinduluka ni ulemu; kapwa ngwe tushitu aze akufwa.

¹³ Yino jila yo yapwa uhepuke wo, hindu kulutwe atu matayiza yambo yo.(Litulike.)

¹⁴ Ngwe mapanga Zambi hanaasela Shiole. Kufwa muchipwa kafunga ko. Mu kucha akwa ululi makaayula. Upeme wo muuhwa mu Shiole; chihela chawo chakuhi.

¹⁵ Hindu Zambi makula mwono wami ku chiyulo cha Shiole, mumu kumakangutambula.(Litulike.)

¹⁶ Kanda wivwa woma muze umwe mamupwisa pichi; muze maweza ku ulemu wa zuwo lienyi;

¹⁷ Mumu muze mafwa kechi kumbata nichimwe. Chipwe ulemu wenyi kuuchi kamukaula.

¹⁸ Chipwe wawahishile mbunge yenyi shimbu atwamine ni mwono, (mba atu makuchichimieka nyi waliwahisa yena mwene.)

¹⁹ Hindu maya ku chisemuko cha akako; kechi kamona pangu, nilimwe tangwa.

²⁰ Mutu yoze kanatwama ku ulemu hindu keshi ni mana, kapwa ngwe tushitu aze akufwa.