Miaso (Masamu) 47 - MUKANDA USANDU WA ZAMBI 1975

¹ Enu mavungu eswe Sakwilenu ni moko jenu; likwizenu kuli Zambi ni liji lia akwa kukumba!

² Mumu Yehova, mwe Chitunda iye kole ni woma, iye mwanangana munene helu lia hashi heswe.

³ Kakuzeyesa atu eka ni eka kuli yetu. Kakupwisa mavungu kushi lia yiliato yetu.

⁴ Hanatutongwela chihinga chetu, we uhenya wa Yakomba yoze wazangile.(Litulike.)

⁵ Zambi hanakanduka ni liji lia kulikwiza. Yehova hanakanduka ni liji lia chitavwi.

⁶ Imbenu uhaliso kuli Zambi; imbenu uhaliso. Imbenu uhaliso kuli mwanangana wetu; imbenu uhaliso.

⁷ Mumu Zambi iye mwanangana wa hashi heswe; imbenu miaso ya kumuhalisa ni chinyingi.

⁸ Zambi kayula helu lia mavungu. Zambi katwama ha ngunja ya usandu wenyi.

⁹ Yilolo ja mavungu hanakunguluka hamuwika ni atu a Zambi ya Apalahama. Mumu kepwe ja hashi heswe ja mbala ja Zambi. Iye kanangama chikolo.