Miaso (Masamu) 46 - MUKANDA USANDU WA ZAMBI 1975

¹ Zambi iye uchinyino wetu ni tachi jetu; iye katwama hehi ni yetu, chikwashi mu lamba.

² Kashika kutuchi kwivwa woma chipwe hashi muhajimuka, chipwe milundu muyitutulukila muchima lia kalunga-lwiji.

³ Chipwe e meya jamo mahanjika ni lundujila nikupinda; chipwe milundu muyinyika ni mikanya yenyi.(Litulike.)

⁴ Kwali umwe lwiji, ana jenyi kakuwahisa mwimbo lia Zambi, ni mwe muma musandu mwa tabernakulu ya mwe Chitunda.

⁵ Zambi kwali hakachi ko; kechi kulihiza; Zambi maakwasa ha kucha chimene.

⁶ Mavungu atenukine; mawanangana atutulukile; iye wahanjikile mba hashi hasangunukine.

⁷ Yehova-wa-Tujita kwali hamwe ni yetu; Zambi ya Yakomba iye uchinyino wetu.(Litulike.)

⁸ Tweyenu nutale yitanga ya Yehova, kupupa chipwa haha halinga hano hashi.

⁹ Hamanununa jita ndo ku songo lia hashi; kakumakuna uta; kakupatula kunga hakachi; kakwocha ni kahia matemba a jita.

¹⁰ Holenu, nunyingike, yami Zambi. Mungukanangama hakachi ka mavungu; mungukanangama hashi heswe.

¹¹ Yehova-wa-Tujita kwali hamwe ni yetu; Zambi ya Yakomba iye uchinyino wetu.(Litulike.) Kuli Njimba mukwa lutwe. Samu lia ana a Kora.