Miaso (Masamu) 45 - MUKANDA USANDU WA ZAMBI 1975

¹ Mbunge yami yinaywelwoka ni chikuma chipema; ngunahanjika yuma ya kutwala kuli mwanangana. Limi liami linapu sonekeso lia yoze wajama kusoneka.

² Wapema kuhiana ana ja atu; hanatehuna vumbi mu mivumbo ye; kashika Zambi hanakuwahisa ku miaka ya mutolo.

³ Yena chitakame lipakate katana ke mu chitongo ni uhenya we ni ulamba we.

⁴ Enda nikuwaha mu ulamba we, mumu ha umwenemwene, ni umbovu, ni ululi. Chindume che muchikulongesa yuma ya kukolesa mwongo.

⁵ Mivu ye yinambuka; yili mu mbunge ja akwa kole ja mwanangana; atu eka ni eka analimbuka kushi lia yena.

⁶ Ngunja ya yena Zambi kuyili ndo ku miaka yeswe ya mutolo; lukanda wa wanangana we lukanda wa ululi.

⁷ Kuwazanga ululi; kuwavwila kole ungulungulu; kashika Zambi, Zambi ye, hanakuwayisa ni maji a uwahililo helu lia akwenu.

⁸ Mazalo je eswe anakupuka ni mira, ni aloa, ni kasha; ku mazuwo ja mwanangana a kutunga ni mazo a njamba anakuwahisa ni tulialia.

⁹ Hakachi ka mapwo je alemu kwali anaa mapwo ja mianangana; ku chindume che kanamana mwanangana wa pwo kanazala oru ya Ofiri.

¹⁰ Panjika, yena mwana wa pwo, ukatale, ukahetamise twitwi lie. Vulama atu je ni zuwo lia tatenu.

¹¹ Mba mwanangana mazanga upeme we, mumu iye Mwene we; umuwayile.

¹² Mwana pwo Teru ni chawana, hamuwika ni pichi hakachi ka atu kumakalembelela vumbi lie.

¹³ Mwanawapwo wa mwanangana kanapeme liakulu muchima lia zuwo. Mazalo jenyi a oru ya kuhosa.

¹⁴ Makamuhetesa kuli mwanangana ni mazalo a kwola. *Avirgem-ni-akwo waze akumukaula no nawa makaahetesa kuli yena.

¹⁵ Makaaneha ni uwahililo ni chiseke; makanjila mu zuwo lia mwanangana.

¹⁶ Ana je a malunga masalakana atatenu; mukaapwisa yilolo hashi heswe.

¹⁷ Mungwaewulwisa jina lie ndusu ku Yisemuko yeswe, kashika atu makakuhalisa ku miaka yeswe ya mutolo. Kuli Njimba mukwa lutwe. Wa ana a Kora Ha Alamote. Mwaso.