Miaso (Masamu) 44 - MUKANDA USANDU WA ZAMBI 1975

Kuli Njimba mukwa lutwe. Masakile ya ana a Kora.

¹ Zambi, hitunevu ni matwi jetu, akaka hanatwambulwila yitanga yize walingile ha matangwa jo, ha matangwa a shakulu.

² Yena ni kwoko lie wahumine akwa mavungu, alioze o waatumbile. Wapinjishile e mavungu alioze o waatuswile.

³ Kuchapwile ngwe ku katana ko azukile chifuchi. Hi kwoko lio ko Kaahele kukumba. Alioze chikambakamba che cha chindume, ni kwoko lie, hamwe ni pangu lia meso je, mumu wawahililile no.

⁴ Yena uli mwanangana wami kanda Zambi yami. Tuma kama ulamwino kuli Yakomba.

⁵ Ku tachi je twakufungika akwa kulimika ni yetu hashi; mu jina lie twakuliata waze akulimika ni yetu.

⁶ Chichi kufuliela uta wami, chipwe katana kami kechi kungulamwina.

⁷ Mumu hiunatulamwina kuli waze akulimika ni yetu; waze akutuvwila kole hiunaakolesa sonyi.

⁸ Muli Zambi twakulisamba tangwa lieswe nganganga; jina lie mutukalihalisa ku miaka ya mutolo.(Litulike.)

⁹ Alioze hiwatumbila; twasauka; kushi kutuhuka hamuwika ni tujita twetu.

¹⁰ Hiwatuhilwisa kunyima kumeso ja mukwa kulimika, ni waze akutuvwila kole kakulihupila upite.

¹¹ Hiwatukunjika ngwe mapanga aze haatongola apwe yifwo; hiwatumwanga hakachi ka mavungu.

¹² Hiwalanjisa atu je ndando yakuhi, kwafumbwile nichimwe ni ndando yo.

¹³ Hiwatutenga ngwe sau kuli akwetu; hatulenya, hatukekuna kuli waze anatujingilika.

¹⁴ Hiwatupwisa ngwe kashilikilo hakachi ka mavungu, kakutuhungila mitwe hakachi ka atu.

¹⁵ Tangwa lieswe kusauka chami chili kumeso jami; sonyi ja meso jami jangufuka,

¹⁶ mumu ha liji lia yoze wakunguchoka nikutuka; mumu hali mukwa kole ni mukwa kukala milonga.

¹⁷ Chino cheswe hichatuwana; hindu kutwakuvulamine. Kutwalingile ni mafwefwe a kulimika ni usendo we.

¹⁸ Mbunge jetu kujatalile kunyima, chipwe mashimbo jetu kahambulukile mu jila ye.

¹⁹ Chipwe hiwatufwenya mu chihela cha mikuza; hiwatuzulamina ni Chizulie cha kufwa.

²⁰ Nyi kachi twavulamine jina lia Zambi yetu tuzoze moko jetu kuli umwe zambi wa kandaka,

²¹ Kachi Zambi kachinyingikishine nyi? Mumu iye kananyingika yuma yeswe ya kuhengama mu mbunge.

²² Alioze hali yena kakutushila tangwa lieswe nganganga; kakutufunjika ngwe mapanga aze maashiha.

²³ Laula Mwene! Kuchi te unayi tulo? Ukatuke! Kanda utumbila ku miaka ya mutolo.

²⁴ Kuchi te unasweke meso je nikuvulama lamba lietu ni yihungumiona yetu?

²⁵ Mumu mbunge jetu jinahetama mu fufuta; majimo jetu kanalamata ha mavu.

²⁶ Hinduka kama utukwase, utukule nawa mumu ha utu wa zango lie. Kuli Njimba mukwa lutwe. Ha Shoshanime. Wa ana a Kora. Masakile. Mwaso wa zango.