Miaso (Masamu) 43 - MUKANDA USANDU WA ZAMBI 1975

¹ Zambi ungupatwile kama yena; unguhakwilile chikuma chami ku vungu lia utanganyanyi; ngupulule kama kuli chilembese ni chihenge.

² Mumu yena uli mwe Zambi muze naswama; kuchi te wangumbila? Kuchi te nakulishimwoka mumu ha kupinjisa cha akwa kole jami?

³ Tuma kama pangu lie ni umwenemwene we, yikangusongwele, yikangutwale ku mulundu we usandu, kwe ku zuwo lie.

⁴ Mba munguheta ku chilumbilo cha Zambi; kuli Zambi iye uwahililo wami Wahiana. Yena Zambi, Zambi yami, mungukwalakana ni kalialia.

⁵ Mbunge yami, yika unahongela? Kuchi te unapinji muchima liami? Talatala kuli Zambi, mumu mungumuhalisa nawa, iye chikwashi cha ku meso jami kanda Zambi yami.