Miaso (Masamu) 41 - MUKANDA USANDU WA ZAMBI 1975

¹ Kawaha yoze wakunyonga yiswale. Yehova kumakamupulula ha tangwa lipi.

² Yehova mamufunga, mamwaha mwono, kumakawaha mu chifuchi. Kuchi kumuhana ku kupala cha akwa kole jenyi.

³ Yehova mamutakamisa ha muu wenyi wa kukokoloka. Yena wakwala muhela wenyi weswe ha kuyiza chenyi.

⁴ Nambile ngwami, Yehova, nguvwile kama vumbi; wuka mbunge yami mumu nakuvulumwine.

⁵ Akwa kole jami akungwamba yuma yipi ngwo, Tangwa lika mafwa, jina lienyi likajimuke?

⁶ Chipwe meza kungutala kumamba yuma yamokomoko. Mbunge yenyi yalikungulwila ungulungulu, muze matuhuka haze machambulula.

⁷ Waze eswe akunguvwila kole kakulinyinguna hamuwika ha kulimika ni yami. Kakungutakila yuma ya kungulemeka.

⁸ Ngwo, Musongo upi wamulalaminya, haliapwila hapomba kechi kahinduka nawa.

⁹ Chipwe sepa liami yoze nalikata nenyi, yoze nafulielele, yoze walile kulia chami, hananguzundwila kashijino kenyi.

¹⁰ Alioze yena Yehova, nguvwile kama keke, unguzundule hanga ngukalikale hali ayo.

¹¹ Ha chikuma chino ngunanyingika ngwami, Kuwanguvwila kuwaha, mumu mukwa kole yami kangukumbile.

¹² Ni yami, wakungukwachilila mu kutuwika chami cha mbunge. Wakungukolesa kumeso je ku miaka ya mutolo.

¹³ Afumane Yehova Zambi ya Izalele, chize ku miaka ya mutolo ndo ku miaka ya mutolo, Amene; Amene.